Mark Wahlberg segir að vinna við framhald gamanmyndarinnar Ted sé þegar hafin.
Framleiðandinn Universal hefur ekki staðfest fregnirnar en Wahlberg segir í samtali við Deadline.com að leikstjórinn Seth MacFarlane sé þegar byrjaður að undirbúa myndina.
„Þeir eru að að vinna í henni núna. Hið frábæra er að hugmyndir Seth fyrir mynd númer tvö eru klikkaðar,“ sagði Wahlberg og hrósaði leikstjóranum enn frekar. „Hann kemur úr sjónvarpsgeiranum og kann að segja sögur á öðruvísi hátt en aðrir. Hann er öðruvísi náungi.“
Ted sló rækilega í gegn á þessu ári. Tekjur þessarar bönnuðu gamanmyndar í miðasölunni úti um allan heim námu yfir 500 milljónum dollara.
