Vaxtarræktarbuff í vanda – Ný stikla

Ekki er langt síðan við birtum nýtt plakat fyrir hina sannsögulegu og testósterónblönduðu bíómynd, Pain and Gain, með þeim Mark Wahlberg og Dwayne Johnson í aðalhlutverkum, í leikstjórn Michael Bay.

Nú er komin glæný stikla fyrir myndina, sem má sjá hér að neðan:

Myndin segir sanna sögu sem gerðist árið 1999 í Miami í Bandaríkjunum þegar þrír vaxtarræktarmenn, sem kölluðust The Sun Gym Gang, á kafi í sterum, glæpum og gleðskap, fara út í mannrán og fjárkúganir, til að verða ríkir. Áætlun þeirra fer síðan illilega úrskeiðis.

Ásamt Johnson og Wahlberg  leika þeir Anthony Mackie, Ed Harris, Tony Shalhoub, Rob Corddry, Rebel Wilson og Bar Paly í myndinni.

Wahlberg leikur Daniel Lugo sem í raunveruleikanum var dæmdur til dauða fyrir glæpina sem fjallað er um í myndinni. Mackie og Johnson leika félaga hans í athæfinu, en Shalhoub leikur ríka glæpóninn sem þeir svindla á. Harris leikur einkaspæjara sem reynir að jafna um þá félaga.

Myndin kemur í bíó í apríl.