Fyrsta stiklan er komin út fyrir Marvel ofurhetjumyndina Doctor Strange, sem kemur í bíó 28. október nk.
Tökum myndarinnar lauk fyrir um viku síðan í New York samkvæmt frétt MovieWeb.com, en tökurnar hófust í nóvember sl. í Nepal og þá í London, Hong Kong, Kathmandu og að lokum í New York City.
Stiklan lítur þrælvel út, Benedict Cumberbatch í hlutverki Doctor Strange, er þjálfaður til góðra verka og heimurinn hringsnýst, ekki ósvipað og menn þekkja úr Inception!
Kíktu á stikluna hér fyrir neðan:
Doctor Strange fjallar um hinn þekkta taugaskurðlækni Stephen Strange, sem uppgötvar falinn heim töfra og annarra vídda, eftir að hafa lent í hryllilegu bílslysi.
Leikstjóri er Scott Derrickson, handrit skrifar Jon Spaihts, sem hann byggir á teiknimyndahetjum eftir Stan Lee og Steve Ditko.
Aðrir helstu leikarar eru Tilda Swinton, Chiwetel Ejiofor, Rachel McAdams, Michael Stuhlbarg, Amy Landecker, Scott Adkins og Mads Mikkelsen.
