Hringadróttinssaga í umsjón nýsjálenska undrabarnsins Peters Jackson kom, sá og sigraði heiminn og ruddi brautina á ýmsum sviðum; í brellum, brögðum og öðrum kraftaverkum í kvikmyndagerð. Þessi virðulegi og stórvinsæli þríleikur vakti veröld og sígild verk Tolkiens til lífsins á skjánum sem aldrei fyrr og komst seigla Jacksons og teymisins skjótt í sögubækurnar enda afrekið fordæmalaust. Slíkt endurtekur sig sjaldan tvisvar.
Síðar tók auðvitað við ferlið og verkefnið sem hörðustu unnendur Máttarbaugsins klóruðu sér lengi í hausnum yfir; aðlögun Hobbitans.
Flestir þeirra sem unnu að hinum undarlega Hobbitaþríleik hafa verið óhræddir við að segja frá skipulagsleysinu og erfiðleikunum á bak við tjöldin. Jackson svaraði kallinu og sat aftur við stjórnvölinn, eða var réttara sagt tilneyddur til þess. Þó kvikmyndirnar um Hobbitann eigi vissulega sína unnendur er næstum því ómögulegt að sjá ekki sprungurnar í smíðunum.
Hvernig urðu tvær fyrirhugaðar bíómyndir að þremur á síðustu stundu? Af hverju er svona mikið um martraðarsögur af settinu? Hvernig urðu fáeinar blaðsíður í bókinni að tveggja tíma orrustuorgíu?
Sigurjón og Tómas veita þau svör og fleiri í nýjasta þætti Poppkúltúrs. Kapparnir rýna í sprungurnar, fáeina sauma og kafa hressilega djúpt í nokkur sár, en leyfa sér líka að muna eftir hinu jákvæða úr myndunum.
Þáttinn má finna gegnum Spotify hlekk hér að neðan, en hlaðvarpið er almennt aðgengilegt á helstu veitum og hér á Kvikmyndir.is.