Það verður alvöru Star Wars stemning í Smárabíó um helgina þegar meðlimir úr 501st Legion mæta á svæðið í glæsilegum búningum og breyta bíóferðinni í upplifun sem minnir helst á ferð inn í vetrarbraut langt langt í burtu.
Gestir geta átt von á að hitta karaktera úr Star Wars heiminum, geta tekið myndir og upplifað aðeins meira en hefðbundna bíósýningu.
Sjálfboðastarf og ástríða fyrir Star Wars
501st Legion eru alþjóðleg sjálfboðasamtök Star Wars aðdáenda sem hafa síðan árið 1997 vakið athygli um allan heim fyrir ótrúlega nákvæma búninga og ástríðu fyrir heimi George Lucas. Samtökin eru oft kölluð Vader’s Fist og eru þekkt fyrir að mæta á viðburði, safna fyrir góð málefni og færa fólki töfra Star Wars heimsins.
Það sem margir vita ekki er að starf þeirra byggir alfarið á sjálfboðavinnu. Samtökin taka ekki hefðbundna greiðslu fyrir komu sína heldur renna framlög sem tengjast verkefnum þeirra beint til viðurkenndra góðgerðarmála.
Á Íslandi starfar hópurinn undir nafninu 501st Icelandic Garrison og telur í dag rúmlega þrjátíu meðlimi. Til að ganga í hópinn þarf að vera orðinn átján ára og eiga búning sem uppfyllir strangar kröfur um útlit og smáatriði.
Mandalorian, Grogu og alvöru Star Wars stemning
Um helgina verða meðlimir á svæðinu í Smárabíó þar sem þeir hitta gesti, sitja fyrir á myndum og skapa einstaka stemningu í kringum sýningarnar.
Samkvæmt skipuleggjendum má meðal annars búast við að sjá Mandalorian og Grogu og fleiri kunnuglega karaktera úr Star Wars heiminum.
Fyrir þá sem vilja skemmtilega og óhefðbundna bíóupplifun er þetta kjörið tækifæri til að gera eitthvað aðeins öðruvísi og sjá kvikmyndaheiminn lifna við utan tjaldsins.
Megi mátturinn vera með ykkur.
Áhugasamir geta kynnt sér sýningartíma og tryggt sér miða á heimasíðu Smárabíós og á Kvikmyndir.is
Star Wars: The Mandalorian and Grogu (2026)
60% 
7/10 
