Bandaríski leikarinn John Stamos var handtekinn í gærkvöldi í Los Angeles vegna gruns um akstur undir áhrifum áfengis, samkvæmt frétt The Hollywood Reporter.
Lögreglan í Beverly Hills fékk fjölda símtala um undarlegt aksturslag bílstjóra um kl. 19.45 á föstudagskvöldinu. Eftir að hafa kannað málið nánar þá stöðvaði lögreglan bílinn og tók Stamos höndum, en hann var einn í bílnum.
Slökkviliðið var ræst út til að kanna ástand leikarans og til að flytja hann á næsta sjúkrahús þar sem ástandsvottorð var gefið út.
Stamos þarf að mæta fyrir rétt 11. september nk. í Los Angeles og svara fyrir brot sitt.