Von er rúmlega 30 gestum á alþjóðlegu kvikmyndahátíðina PIFF (Pigeon International
Film Festival) sem hefst á Ísafirði á fimmtudag. Koma þeir frá flestum heimshornum svo sem Póllandi, Íran, Íslandi og Írlandi. Einn þeirra er John Farrelly, leikstjóri og handritshöfundur hryllingsmyndarinnar An Taibhse sem sýnd er í Ísafjarðarbíói kl. 20 á fimmtudagskvöld. „Það er okkur mikill heiður að kynna An Taibhse á PIFF á Ísafirði, hátíð sem er þekkt fyrir að fagna áberandi og kraftmiklum kvikmyndaröddum. Þetta tækifæri hefur sérstaka þýðingu þar sem það merkir ekki aðeins mikilvæga stund í írskri kvikmyndagerð heldur dregur einnig fram viðvarandi tengsl Írlands og Íslands,“ segir John í frétt sem PIFF sendi til Kvikmyndir.is
„Írska tungan, sem er forntunga okkar frumbyggja, var næstum glötuð eftir aldalangt
landnám Breta, þar sem reynt var að eyða menningarlegri sjálfsmynd okkar. Hins vegar
höfum við barist fyrir því að endurvekja og endurheimta tungumálið okkar og í dag erum
við vitni að endurreisn kvikmynda á írsku, þar sem Taibhse er fyrsta hryllingsmyndin
sem gerð hefur verið algjörlega á okkar móðurmáli. Við erum mjög stolt af því að koma
með An Taibhse til Ísafjarðar, ekki baratil að fagna þessari sameiginlegu arfleifð. Við
erum einnig ótrúlega stolt af því að leggja okkar af mörkum til vaxandi fjölda kvikmynda
á írsku og deila þessu starfi með landsmönnum og alþjóðasamfélaginu hjá PIFF.“
John segir söguleg tengsl á milli Írlands og Íslands vera mjög þýðingarmikil þótt þau séu
oft vanmetin. „Talið er að írskir munkar, þekktir sem Papar, hafi komið til Íslands á
undan norrænum landnámsmönnum og skilið eftir sig ummerki um veru sína í sögunum
og örnefnum. Að auki innihalda Íslendingasögurnar tilvísanir í Íra, sem undirstrika enn
frekar sameiginlega sögu okkar. Þessi tengsl minna okkur á langvarandi
menningarsamskipti þjóða okkar.“
Hlakkar til að eiga samskipti
John segist hlakka til að eiga samskipti við áhorfendur hátíðarinnar og skoða fallegt
landslag Ísafjarðar. „Við erum sérstaklega ánægð með að vera hluti af PIFF vegna
hollustu hátíðarinnar við að sýna kvikmyndir sem þrýsta á mörk og kanna nýjar frásagnir.
Einstök umgjörð Ísafjarðar og orðspor hátíðarinnar fyrir að hlúa að innilegu og grípandi
andrúmslofti gera hana að fullkomnum stað til að sýna An Taibhse. Skuldbinding PIFF
við að fagna fjölbreyttum röddum og efla menningarsamræður samræmist fullkomlega
markmiði okkar um að koma kvikmyndagerð á írsku yfir á heimssviðið. Við erum spennt
að taka þátt í röð kvikmynda sem eiga örugglega eftir að hvetja, ögra og hljóta
hljómgrunn hjá áhorfendum alls staðar að úr heiminum.“
Sýningar PIFF fara fram í Ísafjarðarbíói og kaupfélaginu í Súðavík frá fimmtudegi til
sunnudags. Dagskrá hátíðarinnar má finna á piff.is og frítt er inn á allar sýningar.
