Fréttir herma að spænska leikkonan Penelope Cruz hafi tekið að sér hlutverk Bond-stúlkunar í nýjustu James Bond-myndinni og mun hún þá feta í fótspor Teri Hatcher, Halle Berry, Denise Richard og Ursulu Andress. Cruz hefur áður leikið í myndum á borð við Vanilla Sky, Blow og Pirates of the Caribbean.
Vefsíðan Yahoo greindi frá þessu fyrir fáeinum dögum og segja að framleiðendur hafi oft reynt af fá Cruz til þess að leika í James Bond-mynd en það hafi alltaf hitt þannig á að hún hafi verið upptekin við önnur verkefni á þeim tíma en nú sé það ekki tilfellið.
Cruz fær þann heiður að vera elsta leikkonan til þess að leika Bond-stúlku hingað til. Hlutverk Bond-stúlkunar var síðast í höndum Berenice Marlowe í Skyfall, en sumir vilja meina að Judi Dench hafi verið hin raunverulega Bond-stúlka í þeirri mynd.