Fyrsta stikla úr íslensku spennumyndinni Víkinni er komin út og má sjá hana hér að neðan, en bíógestir hafa fengið að berja stikluna augum síðustu vikur á undan myndum í bíó.
Einnig er komið splunkunýtt plakat með grjóthörðu „tagline“: Í næði. Í bústað. Utan þjónustusvæðis.
Myndin, sem er eftir Braga Þór Hinriksson, verður frumsýnd 30. október í Sambíóunum.
Með helstu hlutverk fara Örn Árnason, Margrét Ákadóttir og Leifur Sigurðsson en kvikmyndin er tekin upp í Fljótavík á Hornströndum sem er einn afskekktasti staður Íslands.
Víkin fjallar um óhamingjusöm hjón sem þola varla að vera í návist hvors annars en fara þó reglulega saman í frí á Hornströndum þar sem þau fá frið frá skarkala heimsins.
Sumarfríinu er snúið á hvolf þegar bandarískur ferðamaður bankar upp á og tekur þau í gíslingu í annarlegum tilgangi sem skekur hjónaband þeirra og tilveru. Í kjölfarið hefst barátta upp á líf og dauða og gömul leyndarmál á milli hjónanna, sem ekki þola dagsljósið, koma upp á yfirborðið.
