Allt í drasli (2005)

Hér fara Heiðar Jónsson snyrtir og Margrét Sigfúsdóttir skólastýra Hússtjórnarskólans í Reykjavík á kostum, svo ekki sé tekið dýpra í árinni. Þau hreinlega taka í gegn, í jákvæðum skilningi, hina og þessa sem hafa gefist upp við húsverkin. Ótrúlega margir einstaklingar og fjölskyldur hafa hreinlega gefist upp á því að halda hlutunum í röð og reglu heima hjá sér. Rykið og draslið er með þvílíkum ólíkindum, að áhrif hefur á andlega og líkamlega vellíðan heimilisfólksins, enda líður engum vel með Allt í drasli. Uppgjöfin getur stafað af tímaskorti eða öðrum ástæðum og segir heimilisfólkið frá því í fullri einlægni. Þá koma Heiðar og Margrét til sögunnar, eins og hvítur stormsveipur, og taka til hendinni svo um munar. Þau takast á við verkefnið, hversu gríðarlega yfirþyrmandi sem það virðist í fyrstu, og hætta ekki fyrr en árangri er náð. Reyndar má segja að í þeirra huga sé ástandið þeim mun "betra" eftir því sem það er verra, enda eru þau hörkutól í hreingerningum. Markmið þáttarins er að gefa þátttakendum ráð og leiðbeiningar, til að halda framvegis í horfinu.