A Girl Walks Home Alone at Night (2014)

Við erum stödd í Vonduborg. Vondaborg er svart-hvít og minnir að því leyti á bæði gamlar Jarmusch-myndir og Sin City og heimildir herma að Vondaborg sé í Kaliforníu. Hér virðast samt bara búa Íranir, það tala allir persnesku í borginni þótt þeir séu klæddir eins og Hollywood-stjörnur sjötta og sjöunda áratugarins. En til Vonduborgar hefur ratað dularfull og blóðþyrst stúlka – en þegar þessi vampírustúlka hittir sjálfan Drakúla úti á götu verður hún ástfangin. Það flækir málin hins vegar að þetta er ekki Drakúla sjálfur, heldur bara mennskur strákur að nafni Arash sem er nýkominn af grímuballi.