Töfrahúsið (2013)

Við kynnumst hér kettlingi einum sem lendir á vergangi þegar vondur eigandi hans ákveður að losa sig við hann. Kettlingurinn kann auðvitað lítið á veröldina og þegar mikið þrumuveður skellur á leitar hann skjóls við dularfullt hús sem við fyrstu sýn virðist autt. Annað kemur þó á daginn því í húsinu býr gamall töframaður og alveg heill hellingur af alls konar persónum sem sumar hverjar eru ekki af holdi og blóði heldur lifandi tæki og leikföng! Gamli maðurinn ákveður að leyfa kettlingnum að búa hjá sér og vinum sínum og gefur honum nafnið Þrumi. En þegar illa innrættur frændi gamla mannsins reynir að komast yfir húsið hans á ólöglegan hátt á meðan sá gamli þarf að dvelja á spítala kemur það í hlut Þruma og hinna nýju vina hans að bjarga málunum ...