Remember Me (2010)

Nei sko! Robert Pattinson getur leikið víst eftir allt saman! Bara svekkjandi að hann skuli ekki vera flinkur að velja góð handrit. Ætli hann sé kannski bara að fikra sig í gegnum hvað sem er til að fá feita launaseðla? Fyrir utan Harry Potter 4 og Twilight 1-3 þá er þetta það eina sem ég hef séð manninn leika í, og þá almennilega leggja sig fram. Hann stendur sig drulluvel, en ef einhver myndi spyrja mig hvort Remember Me væri misheppnuð unglinga indie-melódramamynd þá myndi ég þurfa að segja: Já, frekar.Ég skal alveg játa að það séu fáeinar fínar og jafnvel góðar senur í þessari mynd, og gellan sem leikur á móti Pattinson er alls ekki slæm. Svo vil ég ekki gleyma þeim Pierce Brosnan og Chris Cooper, sem fylla ágætlega upp í staðalímyndir sínar. Sagan hefur líka ýmislegt að segja en það sem algjörlega rústar henni er þvingað drama, persónur sem aldrei ná til manns og endir sem er með því kjánalegasta sem ég hef lengi (já, LENGI) séð. Á fljótu bragði er þetta einhver latasta tilraun að sterku drama sem ég hef séð í kvikmynd. Það kemur fram ákveðið loka-twist, og um leið og myndin uppljóstrar því, þá byrjar maður að finna fyrir því hversu mikið "cop-out" þessi endir er. Ég gæti skrifað mörg, mörg orð um það hversu rangur og asnalegur þessi endir er, en í staðinn læt ég það bara duga að segja að hann skilji eftir mjög pirrandi eftirbragð.Það er rosa lítið um Remember Me að segja þegar maður hemlar sig á því að kvarta undan endinum. Hún mun ábyggilega hitta beint í hjartastað hjá gelgjum sem munu einungis sjá myndina útaf Twilight-dýrkuninni. Ég efa jafnvel ekki það að þær ákveði fyrirfram að myndin sé góð.4/10