Svartir englar (2008)

Saga um fjóra íslenska rannsóknarlögreglumenn sem starfa í drungalegum hversdagsleika Reykjavíkur þar sem alþjóðlegir glæpahringir eru farnir að láta á sér kræla. Sagan gerist í Reykjavík nútímans og eru höfuðpersónur þáttaraðarinnar lögreglumennirnir Stefán, Katrín, Árni og Guðni. Þau eru sammála um að á Íslandi sé allt að fara til fjandans og að starf þeirra sé einungis til málamynda og megi sín lítils í baráttu við ört vaxandi glæpaöldu. Í undirheimum Íslands tíðkast nú ekki bara smáglæpir og fjölskyldutengd afbrot, heldur hættulegri glæpir sem jafnvel er stýrt af kunnáttu mönnum með tengsl við alþjóðlega glæpahringi. Örvæntingarfull barátta lögreglunnar við mjög erfiðar aðstæður er undirliggjandi tónn þáttaraðarinnar. Innri barátta aðalpersónanna og veikleikar þeirra setja svip á söguna auk þeirrar tilfinningar að það sé skítadjobb að vera í lögreglunni. Í fyrri hluta þáttaraðarinnar segir frá eiganda auglýsingastofu, manni á fimmtugsaldri sem finnst látinn fyrir utan fjórtán hæða blokk þar sem hann bjó. Ljóst er að hann hefur hrapað niður af svölunum. Fjóreykið hefur rannsókn og læðist fljótt að þeim sá grunur að honum hafi verið hjálpað niður. Þegar lögreglufólkið er við það að leysa gátuna kemur upp nýtt mál sem reynist öllu flóknara. Um er að ræða hvarf konu, Birgittu, kerfisfræðings sem virðist vera flækt í dularfullt verkefni. Í bakgrunninum er stærra samfélagsmein sem snýr að rafrænu eftirliti yfirvalda með einstaklingum.