Behind Enemy Lines (2001)

Mynd sem hefur allt til að bera til að verða fjögurra stjörnu mynd, en klúðrar því allverulega. Yfirmáta væmnar hetjusenur í hægmynd undir yfirmáta væminni hetjumúsík skemma mjög og hefur maður það á tilfinningunni að ef myndin væri sýnd á réttum hraða væri hún ca. 36 mín. að lengd.

Hinsvegar er ætíð nóg að gerast og myndatakan oft á tíðum mjög skemmtileg, og það ásamt Gene Hackman, nær að gera myndina tveggja stjörnu virði.

Behind Enemy Lines er afskaplega einföld hasarmynd um Bandaríska flugmenn sem skotnir eru niður í S-Bosníu og þurfa að bjarga sér sjálfir án neins hjálpar. Leikurinn er fínn. Myndin er meira skemmtileg en spennandi. Samt Behind Enemy Lines er hin fínasta skemmtun.

Behind Enemy Lines er einföld hasarmynd sem fjallar um bandarískan flugmann sem brotlendir á óvinveittu svæði og þarf að halda sér á lífi uns félagar hans í hernum ná að bjarga honum. Myndin á sína spretti en lítur þó á köflum út eins og tölvuleikur ásamt því sem það gerist ekki mikið annað í henni en að Owen er á harðahlaupum undan hinum ýmsu ógnum. Gene Hackman er góður í hlutverki yfirmannsins en mér fannst persóna hans vera hluti af því að myndin tekur sig dálítið of alvarlega. Líkt og Black Hawk Dawn nýtur þessi mynd góðs af því að koma út tiltölulega stuttu eftir 11. september og því eru vinsældir hennar vestanhafs skiljanlegar. Ef þessari heppilegu tímasetningu er gleymt er hér einungis um að ræða hasarmynd sem slefar yfir meðallagið. Ágætis afþreying, en ekki búast við neinu á borð við Crimson Tide eða Top Gun.

Rosaleg mynd!!!!!!! geðveikur söguþráður!! Owen Wilson fer á kostum sem flugmaður í bandaríska hernum! Gene Hackman stendur fyrir sínu í þessari mynd!! Þessi mynd hefur allt flotta byssubardaga og margt fleira. Þessi mynd á skilið þrjár og hálfa stjörnu. Þeir sem ekki hafa séð hana drífið ykkur á hana og þið munuð ekki sjá eftir því!!!!!!

Ég lagði leið mína á Behind Enemy Lines í fyrradag og var mjög ánægður með útkomuna. Söguþráðurinn er ósköp venjulegur, en mörg góð hasaratriði. Það er allt of langt síðan svona mynd var síðast í bíó. Alltaf skemmtilegt að sjá svona myndir. Myndin fjallar í stórum dráttum um orystuþotu-flugmann sem er skotinn niður þegar hann er að taka eftirlitsmyndir. Hann er hundeltur á jörðu niðri af heilli hersveit á meðan hann vonar að einhver geti komið honum til bjargar. Eitthvað hefur hann tekið myndir af sem er svo leyndardómsfullt að hersveitin myndi nánast gera hvað sem er til þess að það yrði ekki uppljóstrað. Ef þú ert einn/ein af þeim sem hefur gaman af hasar og spennu, þá svíkur þessi engan.

Ég hafði mínar efasemdir þegar ég samþykkti að fara á Behind Enemy Lines, aðallega vegna plakatsins, sem mér fannst ekki lofa góðu. En það má víst ekki dæma myndir eftir plakatinu, hugsaði ég og féllst á að fara. Kom þá ekki upp út dúrnum að ég hafði rétt fyrir mér. Af hverju Gene Hackman samþykkti að leika í þessari mynd er mér ráðgáta. Hann hefur reyndar verið að leika í annarri hverri mynd undanfarið og halar sjálfsagt inn nokkra aura á hverri. En hann, eins og aðrir, eiga ekki séns í að gera nokkuð við þetta þunna handrit sem einhver tólf ára strákur virðist hafa skrifað fyrir jafnaldra sína, og raunar hefði ég haft gaman af henni sjálfsagt ef ég væri 12 ára, en ekki tvisvar sinnum það eins og er raunin. Persónurnar eru frámunaheimskar, og þrautþjálfaðir bandarískir hermenn láta tilfinningarnar ráða er þeir standa augliti til auglitis við hættuna. Það væri kannski ekki afleitt ef einhver af leikurunum gæti tjáð tilfinningar, en meira að segja Gene Hackmann kemur út eins og fáviti þegar eitthvað á að reyna á hann. Myndin byrjaði reyndar ekki svo illa, og það brá meira að segja fyrir smá húmor, sem hverfur algjörlega eftir það, þrátt fyrir nokkrar mislukkaðar tilraunir. Þeir sem leggja á sig að fara á þessa mynd ættu að vita að þegar upphafsflugsenan er búin, þá fer allt niðrá við. Sú sena er nefninlega frábær, þar sem flugmenn á orrustuþotu reyna að komast undan tveimur flugskeytum. Þar nýtur ýkt myndatakan sín í eina skiptið í myndinni, en leikstjórinn hefur þá áráttu að láta myndavélina snúast í kringum allt sem er að gerast, ásamt því að koma með kunnuglega hratt/hægt myndatöku sem hefur verið að ryðja sér til rúms í myndum síðustu árin og MTV ber sjálfsagt ábyrgð á. Einnig finnst mér líklegt að höfundurinn hafi einhvern tíma spilað Metal Gear Solid fyrir þá sem þann tölvuleik þekkja, sérstaklega út af gauknum með sniper-riffilinn sem hundeltir persónu Wilsons alla myndina. Hann hefur líka séð Patriot Games. Samanlagt er þetta sem sagt vond mynd, hún væri kannski þolanleg ef hún hefði ekki verið svona óendanlega heimskuleg. Hápunktinum í vitleysunni nær hún þegar tveir óvildarmenn Wilsons finna notað skothylki hans á 1000 hektara svæði. Líklegt! Forðist þessa, en það ætti að vera óhætt að senda krakkana. Því þrátt fyrir mikið ofbeldi verður myndin aldrei ljót eða blóðug.

Behind Enemy Lines er algjört frat. Hún er ekki óþolandi til áhorfs heldur er hún bara svo kjánaleg á köflum að það mætti halda að hér væri um að ræða einhvers konar paródíu. Það er eins og leikstjórinn hafi ætlað sér að gera Die Hard, en endað með því að gera Hot Shots!Owen Wilson getur verið mjög skemmtilegur leikari og við vitum flest öll að hann getur verið mjög góður handritshöfundur. Gene Hackman er líka auðvitað... ja... Gene Hackman! Stundum frábær, stundum fínn, en alltaf með góða nærveru. Að sjá þessa tvo sameinaða gat ekki hljómað illa. En hvað það er leiðinlegt að hafa rangt fyrir sér.Þessi mynd hefur ábyggilega verið auðfenginn launaseðill fyrir Hackman, en Wilson hlýtur að hafa tekið sitt hlutverk alvarlega þar sem hann leggur heilmikið á sig. Það er nánast óþægilegt að horfa á hann þegar myndin er sjálf svona mikið kjaftæði. Behind Enemy Lines vill auðvitað vera spennandi út í gegn, en í raun er hún bara vitleysa. Ég hef alltaf gaman af góðum hasar, og einkunnin sem ég gef er reyndar bara fyrir hann einan og sér. Söguþráðurinn lofar góðu í fyrstu, en þegar cirka hálftími er liðinn fer myndin bara út í endalausan eltingaleik, og Wilson gerir þá lítið annað en að hlaupa (ekki grín! Hann setur einhvers konar Forrest Gump-met í spretti) út alla restina af myndinni.Myndin er einnig stútfull af ýmsum heimskulegum og klisjukenndum atvikum, og þar má nefna þegar aðalpersónan dulbýr sig í óvinaeinkennisbúningi svo að hann sleppi undan, svo var það einnig mjög þreytandi hvað þessi aðalpersóna sleppur oft undan heilum her af vopnuðum mönnum. Svo þegar hermenn í hundraðatölu skjóta á hann á fullu (m.a.s. skriðdrekar eru notaðir), hitta þeir hann aldrei þegar hann er á flótta, en þegar hann skýtur á þá missir hann aldrei marks. Við höfum séð þessa einn-á-móti-öllum klisju einum of oft. Sóað er fínni kvikmyndatöku og flottum klippingum í þessi vonbrigði, og sömuleiðis með tónlistina. Ég ráðlegg flestum að forðast myndina og bendi einnig á að meiri spennu má finna í Black Hawk Down eða Spy Game.4/10

Ég verð að segja að svona andsk.... vellu hef ég vart augum litið. Myndin fjallar í stórum dráttum um flugmann sem er skotinn niður í eftirlitsflugi í Bosníu eftir að hafa tekið myndir af fjöldagröfum. Eftir þetta upphefst svo ein heimskulegasta atburðarás sem ég man eftir en verður ekki rakin hér. Hér er á ferðinni mynd um John McClane (karakterinn í Die hard) Bandaríska hersins, maðurinn sem tekur á móti heilum her og munar ekkert um það. Sé minnst á eitt af þessum fáránlegu atriðum er eitt sem ég ældi næstum yfir en það er þegar flugmaðurinn biður um vatn á einum stað í myndinni, þá var ekkert til að drekka nema KÓK. Hvað er að þessu liði ekki að myndin hafi ekki verið nógu andsk... heimskuleg fyrir. Forðastu þessa sem heitan eldinn, ef þú aftur á móti ákveður að fara á þessa í bíó skaltu taka með þér Bandaríska fánann og vera tilbúinn að syngja þjóðsöng Bandríkjanna með tárin í augunum í lok myndarinnar. Myndin fær því einungis hálfa stjörnu fyrir Kók auglýsinguna sem ein sér hefði verið betri.

Enn á ný tekst Hollywood að eyðileggja annars fjandi góða mynd með því sem hrellir mig oftar en ég vil muna: Yfirgengileg föðurlandsást og væmni þar fram eftir götunum, en á þessum síðustu og verstu tímum er varla við öðru að búast. Í frumraun sinni skilar leikstjórinn John Moore af sér mynd sem er mjög auðveld áhorfs. Kvikmyndataka, tæknivinna, klippingar, og allt í þeirri deild er óhikað fyrsta flokks. Sagan er traust og í raun sú fyrsta sem ég hef séð sem tekst á við að segja sögu úr Júgóslavíustríðinu og notast við atburði sem eiga sér stoð í raunveruleikanum, ekki heilabúi einhvers handritshöfundar. Gene Hackman er náttúrulega snilldargóður leikari, og Owen Wilson er án efa með áhugaverðustu leikurum sinnar kynslóðar (það verður gaman að sjá þá tvo aftur í The Royal Tenenbaums). En því miður fer pólitíkin illa með þessa mynd. Sagan af herflugmanni sem er skotinn niður yfir Bosníu og verður að flýja undan gerspilltum og morðóðum Serbum er því miður notuð eins og áróðrarmaskína fyrir hægrisinnaða Repúblikana. NATO og Evrópubúar eru hér gerðir að aumingjum sem vilja ekkert annað en að friða vondu kallana með samningum og viðræðum. Ameríkanarnir eru hetjurnar sem eru til í að fórna eigin lífi og limum til að gera það sem rétt er. Ojbarasta. Ekki hjálpar tónlistin, sem er á köflum svo yfirgengilega viðurstyggileg að ég gat ekki annað en hlegið. Þetta er ein af þessum myndum (líkt og Crimson Tide og A Few Good Men) sem þarf að klippa til og laga að hugarheimi sem bleytir sig ekki við að sjá ameríska fánann. En þar sem líkurnar á því eru litlar sem engar vara ég íslenska áhorfendur við að þetta er mynd þar sem þið andvarpið í pirringi yfir lokaatriðinu. Don't say I didn't warn you...

Þegar ég sá trailerinn af þessari mynd þá hugsaði ég: þessa mynd verð ég að sjá, það er vegna þess að ég hef alltaf verið mjög hrifinn af myndum sem tengjast hernaði. Síðan þegar ég sá þessa mynd þá varð ég ekkert fyrir vonbrigðum en hún er hreinasta snilld og ég mæli með því að fólk skelli sér á hana þegar hún kemur í bíó hérlendis.

Í stórum dráttum er þetta mynd umm flugmann í Bandaríska hernum sem er skotinn niður í Bosniu vegna þess að hann sá hluti sem enginn mátti sjá né vita af.
Það er einn hlutur í myndinni sem ég skil ekki alveg en það er hve mikið þol hann hefur, Ég persónulega gæti aldrei meikað það að hlaupa svona mikið.

En ég mæli með þessari mynd og gef henni 3 stjörnur.