Dr. Dolittle 2 (2001)

Ég fékk meira en nóg af talandi dýrum þegar ég horfði á Cats & Dogs núna í sumar, þannig að ég vonaðist til þess að sjá eitthvað töluvert skárra hérna. Bjartsýni var að vísu ekki í hámarki þar sem að fyrri Dr. Dolittle-myndin var frekar slöpp. Þessi mynd er sem betur fer skárri (ath. ekki betri, heldur "skárri"), en það er varla nóg til að réttlæta það að fólk fari að borga fullt verð fyrir að sjá hana. Kannski fínt að horfa á hana á Laugardegi ef hún er sýnd í barnatímanum, en ef menn ætla að leigja sér hana og hafa það notalegt með helling af nammi þá er kvöldinu heldur betur sóað.Eddie Murphy er ágætur þótt það sjáist að hann reynir ekki mikið á sig. Það er eins og að hann hafi samþykkt að gera þessa mynd með þau skilyrði að gera sem minnst og fá slatta af peningum fyrir það. Sama gildir um alla aðra leikara, þá sem sjá um raddirnar (nema Steve Zahn, sem var furðu hress en helvíti pirrandi) og meira að segja leikstjórann og handritshöfundinn. Brandararnir eru ótrúlega latir og alveg jafn barnalegir og í fyrri myndinni. Ég held að ég hafi hlegið einu sinni eða mesta lagi tvisvar yfir allri myndinni, og þótt að það muni seint kallast jákvætt, þá var það oftar en ég hló yfir fyrri myndinni.5/10

Fín mynd. Fór á hana með vinkonu minni. Myndinn fjallar um að dýr biðja hann að bjarga skóginum, heimili þeirra. Hann reynir að fara í mál við þá sem ætla að eyðileggja heimili þeirra og hann á erfitt með stoppa þá, þið ver verðið svo bara að sjá afganginn. Vel leikin mynd og frábærar tæknibrellur, toppmynd!

Flott mynd. Fyndinn á köflum. En þetta er nú bara enn ein Bandaríska kliskjan. Hún er mjög svipuð og sú fyrri en mér finnst þessi nú fyndnari. Mikið af dramatískum atriðum. Faðmast mikið og grenjað. Væmin og óspennandi mynd. Þessi mynd er um Dr. Dolittle sem hefur þann eiginleika að geta talað við og skilið dýr. (Vei). Það á að högva niður tré og þá verða öll dýrin að fara. Dr. Dolittle dettur eithvað sniðugt í hug eins og fyrri daginn. Ágætis mynd sem maður getur tekið alla fjölskilduna á.

Eddie Murphy er frábær gamanleikari og á mun betra skilið heldur en að leika í lélegu framhaldi af lélegri mynd. Þessi mynd er afskaplega ófrumleg, ófyndin og ósniðug. Þrjú Ó í röð eru ekki góðs viti. Í þessari mynd á læknirinn sem getur talað við dýrin að bjarga skóglendi frá vondum skógarhöggsmönnum með aðstoð sirkusbjörns. Einhverjum framleiðanda hefur dottið þessi söguþráður í hug meðan hann sat á klósettinu og hefur skrifað hann aftan á klósettpappír. Hún er illa gerð, það er verulega lélegt tónlistarval í henni, hún heldur illa athygli manns og mér hrútleiddist þrátt fyrir að vera mikið fyrir fjölskyldumyndir. Það eina sem dregur myndina upp er drepfyndið cameo hjá Ahnuld Schwarzenegger sem bjargaði alveg myndinni. Í heildina litið myndi ég ráðleggja öllum, ungum sem öldnum að forðast peningaeyðslu á þessa mynd.

Þessi framhaldsmynd er vissulega dálítið betri en forverinn, þótt það geti reyndar ekki að það geti talist mikið hrós. Eins og áður er aðalpersónan Dagfinnur Dýralæknir sem býr yfir þeim hæfileika að geta talað við dýr. Hér þarf hann að bjarga skóglendi frá gráðugu stórfyrirtæki sem vill höggva það niður og halda um leið saman fjölskyldu sinni sem er ekki öll hrifin af hæfileikum fjölskylduföðursins. Það eru fyndin augnablik á stöku stað en þar sem myndin keyrir ekki áfram á neinu öðru en húmor eru þau of fá. Sumir brandarar eru líka ofnotaðir á ótrúlega klaufalegan hátt, hversu oft á til dæmis að vera hægt að hlæja af birni syngja I Will Survive?? Ég geri mér grein fyrir því að markhópurinn eru krakkar upp í fjórtán ára aldur en bara þótt að þessi hópur sé almennt ekki mjög kröfuharður finnst mér það engin afsökun fyrir aðstandendur myndarinnar að slá slöku við. Annað sem fór í taugarnar á mér er tónlistin í myndinni, en þrátt fyrir að nánast allar persónur í myndinni séu blökkumenn er óþarfi að nota bara rapp og R&B tónlist - sérstaklega þar sem hér á að vera um fjölskyldumynd að ræða. Þrátt fyrir að hún hafi sína galla má njóta Dr Dolittle 2 á einhverju plani en ég ráðlegg nú samt þeim sem eru komnir fram yfir unglingsaldurinn að hugsa sig tvisvar um.

Jæja, ég skellti mér á þessa mynd í gær þar sem vinkona mín vildi ekki á Pearl Harbor og ég verð að segja ykkur að ég varð ekki fyrir neinum vonbrigðum með hana! Eddie Murphy er alltaf jafn fyndinn!! Ég get ekki sagt að tónlistin hafi verið góð þar sem ég get ekki hlustað á rapp en þið rappararnir þarna úti getið eflaust dillað ykkur við hana :) En heildina á litið þá er þetta falleg og fyndin mynd fyrir alla fjölskylduna og með góðan boðskap. Endilega kíkið á hana!

Hafið þið séð mynd sem var svo ófyndin, svo ömurleg, svo laus við allan söguþráð og svo aumkunarverð að ykkur varð illt? Þannig leið mér þegar ég horfði á fyrstu Dr. Dolittle myndina sem kom út fyrir nokkrum árum. Af hverju er ég þá að tala um framhaldið? Af hverju sá ég framhaldið? Ja, þetta er allt saman Regnboganum og óvissusýningu þeirra að kenna! Ég bjóst við (og vonaði innilega) að ég myndi sjá Moulin Rouge, Evolution, A Knight's Tale eða þess vegna Josie and the Pussycats. En, nei! Dr. Dolittle 2 varð fyrir valinu. Þar sem ég geng yfirleitt ekki út af kvikmynd eftir að hún er byrjuð (fyrir utan hörmungina Big Momma's House, sem ég, tilviljunarkennt, sá einnig á óvissusýningu fyrir ári síðan) ákvað ég að sitja sem fastast og reyna að finna a. m. k. eitthvað skemmtileg við myndina. Og það tókst. Og ég þurfti ekki einu sinni að leita lengi. Dr. Dolittle 2 er óendanlega mikið betri en forveri hennar. Húmorinn er betri, söguþráðurinn er betri (þó hann sé eiginlega ekkert annað en endurunninn Disney söguþráður, en samt betri en ósöguþráðurinn í fyrri myndinni) og allt annað er betra. Það fer kannski í taugarnar á einhverjum púristum að myndin skiptir of augljóslega um náttúrulegt location umhverfi og svið og húmorinn er kannski ekki alltaf mjög smekklegur, en fjandinn hirði þá! Þetta er mynd fyrir krakka og þeir eiga eftir að skemmta sér konunglega! Í fyrra sá ég tvær svokallaðar fjölskyldumyndir, The Grinch og Dinosaur, sem voru báðar afskaplega misheppnaðar og vægast sagt lélegar myndir. Þegar ég varaði fólk við því að sjá þær kom næstum alltaf upp þetta comment: En krakkarnir hafa gaman af þessu! Kannski, en þegar talað er um fjölskyldumyndir eiga þá BARA krakkarnir að hafa gaman af þeim? Hvað með foreldrana sem eyða offjár í að fara með börnin sín á myndirnar? Á þeim að leiðast? Ekki held ég það. Sem betur fer er árið 2001 strax mikið betra þegar kemur að fjölskyldumyndum, með þessari mynd og svo hinni frábæru Spy Kids sem er ennþá í bíó. Þó ég mæli sterklega með því að fólk sjái frekar Spy Kids heldur en þessa, þá get ég ekki gert að því að ráðleggja fólki að sjá Dr. Dolittle 2 vegna þess að hún er einfaldlega skemmtileg!

Ég fór á þessa mynd þegar að það var óvissusýning í Regnaboganum. Ég var að vonast að það væri einhver önnur mynd sem hafði komið. En hún kom mér mjög á óvart því að ég hélt að hún væri leiðinleg en þvert á móti var hún mjög skemmtileg og mjög góð hún er ótrúlega fyndin og frábærir aukaleikarar sem tala fyrir dýrin. Hún er frábær fjölskyldumynd og bara góð mynd í alla staði. Frábær mynd og ég segi bara við þá sem hafa ekki séð hana farið á hana þegar hún kemur út 22 júni hérna á íslandi.