Framhaldsmyndin Michael 2 mun fjalla um töluvert viðkvæmara tímabil í lífi Michael Jackson en fyrri myndin og meðal annars taka fyrir ásakanir um kynferðisofbeldi gegn börnum sem komu fram á hendur poppstjörnunni.
Jaafar Jackson, sem leikur frænda sinn Michael Jackson í myndunum, segir að framhaldið muni gefa áhorfendum meiri innsýn í málið frá sjónarhorni Michaels sjálfs.
„Ég held að seinni myndin muni gefa enn meiri innsýn frá hans sjónarhorni, því þegar öllu er á botninn hvolft koma ásakanirnar alltaf frá einhverjum öðrum,“ sagði Jaafar í viðtali við GQ Middle East, miðausturlenska útgáfu hins þekkta tísku- og menningartímarits GQ.
Fyrri myndin, Michael, fjallar fyrst og fremst um uppvöxt Jacksons og leið hans að heimsfrægð og lýkur árið 1987, við útgáfu tónlistarmyndbandsins við Bad. Ásakanirnar, sem fyrst komu fram á tíunda áratugnum, eru því ekki teknar fyrir þar.
Leikstjórinn Antoine Fuqua hefur áður sagt að atriði sem tengdust ásökununum hafi upphaflega verið hluti af myndinni, en ákveðið hafi verið að sleppa þeim og einbeita sér frekar að fyrri hluta ævi Jacksons.
Jaafar segir mikilvægt að seinni myndin sýni einnig hvernig Michael sjálfur upplifði síðari ár ævi sinnar og þá miklu umfjöllun sem fylgdi ásökununum. Fjölskylda Jacksons hefur lengi hafnað ásökununum.
Umfjöllunin gæti orðið eitt umdeildasta viðfangsefni Michael 2, enda hefur arfleifð Michael Jackson lengi verið umdeild.
Lionsgate stefnir á að tökur á framhaldsmyndinni hefjist undir lok árs 2026 eða snemma árs 2027.
Heimildir:
Deadline – Jaafar Jackson Says ‘Michael’ Sequel “Will Give Even More Insight” Into Child Abuse Allegations “From His Point Of View”
MovieWeb – ‘Michael 2’ Star Reveals How Sequel Will Tackle Child Abuse Allegations
Michael (2025)
7.5 
9/10 
