Adam McKay, leikstjóri Anchorman 2, segir að önnur útgáfa af myndinni með bröndurum sem komust ekki í þá fyrstu sé í undirbúningi.
Þannig verður farið lengra en að gefa aðeins út á DVD nokkur atriði sem voru klippt út.
„Það var svo mikill spuni í gangi að við getum bókstaflega sett nýjan brandara í staðinn fyrir hvern einasta í myndinni. Ég held að klipparinn sé að vinna í þessu núna með 250 nýjum bröndurum,“ sagði McKay við Empire Magazine.
„Það væri mjög gaman að setja þessa mynd í miðnætursýningar. Ég veit að ef ég dýrkaði einhverja mynd og einhver segði mér að mynd eins og Airplane! hefði verið gefin út þar sem búið væri að skipta gömlu bröndurunum út fyrir nýja myndi ég hoppa hæð mína,“ sagði McKay.
Kvikmyndahúsagestir gætu sem sagt fyrst horft á myndina með bestu bröndurum og svo séð hana, á öðrum sýningartímum, með sömu sögunni nema hvað að búið væri að skipta um alla brandana.