Latino Review vefsíðan birti nú rétt í þessu söguþráðinn fyrir sjónvarpsþættina Marvel Agents of S.H.I.E.L.D. , sem við höfum sagt frá hér á síðunni og verða frumsýndir í haust.
Serían hefst þar sem bíómyndinni The Avengers lauk. Þetta er rétt eftir bardagann um New York, og nú þegar tilvist ofurhetja og hins ótrúlega er orðin almenn vitneskja, þá er heimurinn að reyna að átta sig á hinu breytta landslagi.
Útsendarinn Phil Coulson er mættur aftur og fylgist nú grannt með dularfullum hópi sem kallast The Rising Tide. Til að ná að fylgjast betur með þessum óþekkta óvini, þá kallar hann saman lítinn, vel valinn hóp af útsendurum úr alheims löggæsluteyminu sem þekkt er undir nafninu S.H.I.E.L.D. ( (Strategic Homeland Intervention Enforcement and Logistics Division). S.H.I.E.L.D. teymið hefur eitt markmið: að rannsaka hið nýja, skrýtna og óþekkta hvar í heimi sem er, til að vernda venjulegt fólk fyrir því óvenjulega og ófyrirséða.
Marvel Agents of S.H.I.E.D. verða frumsýndir 24. september á ABC sjónvarpsstöðinni bandarísku.
