Í fyrra kom út hryllings-gamanmyndin Tucker & Dale vs. Evil sem var bæði skrifuð og leikstýrt af Eli Craig. Myndin er aðeins nýbúin að fá útbreiðslu í amerískum kvikmyndahúsum á þessu ári og settist Craig því niður með What Culture! Þar gaf hann í ljós að ef að myndinni myndi ganga nógu vel færi hann að vinna að framhaldi: „Það er erfitt að segja hversu vel henni hefur gengið hingað til, en þetta er að takast. Ef henni gengur aðeins betur væri ég ansi spenntur fyrir því að gera framhald undir titlinum Tucker & Dale Go To Yale.“
Fyrsta myndin fjallaði um þá félaga Tucker og Dale sem eru, í þvílíkri mótsögn við nútíma Hollywood, tveir góðhjartaðir ‘sveitalubbar’. Þeir eru nýbúnir að kaupa lítið sumarhús í miðju skóglendi og fara þangað til að gera húsið upp eina helgi. Það vill svo til að hópur af djammandi ungmennum eru að tjalda á sama svæði og í gegnum röð af óheppilegum atvikum neyðast Tucker og Dale til að hjúkra ungri konu. En vinir hennar eru aðeins of blindaðir af hryllingsmynda klisjum og upphefst þá gamansöm tilraun Tuckers og Dale til að lifa af árás ungmennana.
Myndinni hefur hingað til verið tekið ansi vel og mæli ég sjálfur fastlega með því að allir lesendur sem hafa ekki séð hana hafi upp á henni sem fyrst. Leikstjórinn talaði stuttlega um hugsanlegan söguþráð seinni myndarinnar og vildi hann lýsa henni svona: „Fyrir okkur er þetta svona From Dusk Till Dawn-dæmi, þar sem það er allt þetta kolklikkaða fólk á skólalóðinni og Tucker og Dale þurfa að finna leið til að lifa af.“ Hann bætti einnig við að báðir aðalleikararnir, Alan Tudyk og Tyler Labine, væru meira en til í að gera framhald: „Þessir gaurar eru miklir styðjendur myndarinnar og elska hana og þeir eru til. Vonandi fæ ég líka Katrinu [Bowden] til að koma aftur fram í henni.“
Að lokum tilkynnti hann að hann væri með annað gaman/hryllings verkefni í vinnslu og að það væri „blanda af Meet the Parents og The Omen.“
