Um það leyti sem handritshöfundar í Hollywood fóru í verkfall og The Hobbit horfði fram á endalausar tafir lét leikarinn Ian McKellen hafa það eftir sér að ef tökur myndu tefjast mikið lengur myndi hann ekki snúa aftur. McKellen, sem fór með hlutverk Gandalfs í Lord of the Rings seríunni, hefur nú staðfest að hann muni bregða sér aftur í gervi galdramannsins víðfræga.
Á vefsíðu sinni segir leikarinn, „The Hobbit, sem verða tvær kvikmyndir, mun hefja tökur í febrúar á næsta ári. Handritið þróast áfram, og margir gamlir og nýjir vinir munu halda á vit ævintýra á ný.“
Ótalmargir aðdáendur Hringadróttinssögunnar anda án efa léttar við þessar fréttir. Fyrsti hluti The Hobbit er væntanlegur árið 2012, og verður í leikstjórn Peter Jackson.
– Bjarki Dagur
