Framleiðslufyrirtækið Vertical Entertainment hefur sent frá sér fyrstu stikluna fyrir gamanmyndina Drunk Parents, eða Drukknir foreldrar, í lauslegri íslenskri þýðingu.
Leikstjóri er Joe Dirt 2: Beautiful Loser leikstjórinn Fred Wolf. Aðalleikarar eru þau Alec Baldwin og Salma Hayek, en þau leika hjón í efri stétt, sem eru að reyna að fela fjárhagserfiðleika fyrir dóttur sinni og fólkinu sem þau umgangast.
Nánari söguþráður er þessi: „Frank og Nancy Teagarten, eru hin fullkomna lág – efristéttar fjölskylda sem ekur um í spegilgljáandi Range Rover og á heima í smekklegu húsi í Tudor stíl. Dóttir þeirra er að byrja í menntaskóla og þau aka henni fyrsta daginn, og gætu ekki verið stoltari. En þegar innheimtumaður bankar á dyrnar stuttu síðar fer að hrikta í lífsstílnum, og mögulega eru þau ekki eins fjárhagslega stöndug og maður hélt! En þau eru staðráðin í að koma dóttur sinni í gegnum menntaskólann, og halda því bílskúrssölu á dóti til að afla fjár, en enda svo á klikkuðu fylleríi. Daginn eftir vakna þau og átta sig á að þau hafa gert ýmislegt sem þau hefðu kannski ekki átt að gera. Í kjölfarið gera þau hvað þau geta til að fela þá staðreynd að ríkidæmið er að dvína.
Drunk Parents fer beint á DirectTV sjónvarpsrásina 21. mars nk. en svo í bíó 19. apríl. Myndin er ekki skráð með frumsýningardag á Íslandi.
Kíktu á stikluna hér fyrir neðan: