Fyrsta stiklan úr nýju Sacha Baron Cohen myndinni, The Brothers Grimsby, þar sem Baron Cohen og Mark Strong fara með hlutverk tveggja ólíkra bræðra sem voru aðskildir í æsku, er komin út.
Bróðirinn sem Mark Strong leikur verður harðskeyttur leigumorðingi fyrir leyniþjónustuna MI6 að nafni Sebastian, en hinn bróðirinn er aulaleg fótboltabulla, Nobby að nafni.
Nobby býr í fiskibænum Grimsby ásamt eiginkonu, sem Rebel Wilson leikur, og níu börnum þeirra. Nobby hefur eytt allri ævinni í að leita að ástkærum bróður sínum, og þegar hann loks finnur hann og kemst að því hvað hann starfar við, þá kemst hann einnig að því að Sebastian býr yfir upplýsingum um hræðilega hluti sem setja heiminn í hættu.
Þegar Sebastian er ranglega tengdur við þessa illu áætlun, þá fer hann á flótta og þarf að vinna með bróður sínum við að bjarga heiminum.
Leikstjóri er Louis Leterrier og handrit gerði Sacha Baron Cohen, Eric Fellner og Nira.
Myndin kemur í bíó 11. mars 2016.
Sjáðu stikluna hér fyrir neðan: