Sambíóin frumsýna rómantísku uppvakningamyndina Warm Bodies fimmtudaginn 14. febrúar nk.
Í tilkynningu frá Sambíóunum segir að Warm Bodies sé fyndin, spennandi og um leið rómantísk mynd um uppvakning sem fær hjartsláttinn að nýju eftir að hann verður ástfanginn.
Sjáðu stikluna úr myndinni hér að neðan:
„Óhætt er að segja að kvikmyndin Warm Bodies hafi vakið mikla athygli að undanförnu þrátt fyrir að hafa ekki enn verið frumsýnd. Stiklan úr henni er afbragðsgóð og sú hugmynd að uppvakningar geti læknast og snúið aftur til eðlilegs lífs verði þeir ástfangnir er skemmtilega frumleg og djörf. Hver veit nema hér sé kominn einn af óvæntustu smellum ársins?,“ segir í tilkynningu Sambíóanna.
Það er Nicholas Hoult sem fer með hlutverk uppvakningsins sem kallaður er R vegna þess að hann hét R-eitthvað í lifanda lífi. R man ekki hvað gerðist eiginlega sem leiddi hann í þetta leiðindaástand sem líf uppvakninga er og stundum vildi hann óska þess að hann væri bara dauður, þ.e. ef hann væri ekki dauður nú þegar.
Dag einn þegar R er í fæðuleit lítur hann augum mannlega stúlku og í stað þess að ráðast á hana og tæta hana í sig eins og uppvakninga er siður og eðli tekur hjarta hans sinn fyrsta kipp síðan hann varð uppvakningur.
Við það vakna með honum tilfinningar sem hann hafði ekki áður og í stað þess að ráðast á stúlkuna verndar hann hana og um leið er ástarsaga aldarinnar hafin…
Aðalhlutverk: Nicholas Hoult, Teresa Palmer, John Malkovich, Dave Franco, Annaleigh Tipton og Rob Corddry.
Leikstjórn: Jonathan Levine
Bíó: Sambíóin Egilshöll, Álfabakka, Kringlunni, Akureyri og Keflavík
Aldurstakmark: 16 ára
