Foxx trassaði gangstétt

Gangstéttin fyrir framan hús Óskarsverðlaunaleikarans Jamie Foxx er stórhættuleg, það er amk. það sem kona ein heldur fram, sem hrasaði á stéttinni og kennir Foxx um allt saman.

TMZ.com vefmiðillinn greinir frá því að konan, Catherine Jones, hafi lagt fram kæru á hendur Jamie fyrir rétti í Los Angeles, þar sem segir að hún hafi komið í veislu á heimili hans á síðasta ári og hafi hrasað á gangstéttinni, og slasast alvarlega.

Hún segir að Foxx sé um að kenna þar sem hann hafi ekki sinnt viðhaldi á gangstéttinni, með fyrrgreindum afleiðingum.

Hún fer fram á það að spítalakostnaður verði greiddur og annað tjón, eða alls um 10 þúsund Bandaríkjadalir.

Jamie hefur enn ekki tjáð sig um málið.