Leikarinn Jeff Goldblum, sem margir muna eftir úr hryllingsmyndinni The Fly og fleiri góðum myndum, og sjónvarpsþáttunum Law and Order sem hann er að leika í núna, á í basli með eltihrelli, sem hefur verið að angra hann síðustu ár. Hinn meinti eltihrellir heitir Linda Ransom og var nú síðast handtekin á laugardagskvöldið í Los Angeles fyrir að brjóta þriggja ára nálgunarbann gagnvart Goldblum.
Ransom hafði verið skipað að halda sig a.m.k. 90 metrum frá Goldblum allt til 12. júní, 2015. Hún braut það bann á laugardaginn þegar til hennar sást í aðeins 18 metra fjarlægð frá leikaranum.
Ransom var handtekin og færð á lögreglustöð.
Ransom hitti Goldblum fyrst á leiklistarnámskeiði hjá honum fyrir 11 árum síðan.