Íslenska þáttaröðin Danska konan vann til tvennra verðlauna þegar nýju Freyjuverðlaunin voru afhent í fyrsta sinn í Helsinki.
Þættirnir voru valdir besta norræna sjónvarpsþáttaröðin og danska leikkonan Trine Dyrholm hlaut einnig verðlaun fyrir leik sinn í aðalhlutverkinu.
Danska konan er sex þátta íslensk-frönsk dökk gamansería í leikstjórn Benedikts Erlingssonar. Hann skrifaði þættina ásamt Ólafi Agli Egilssyni og serían var frumsýnd á RÚV 1. janúar 2026.
Dyrholm leikur Ditte Jensen, fyrrverandi starfsmann dönsku leyniþjónustunnar sem flytur í fjölbýlishús í Reykjavík í leit að rólegra lífi.
Það reynist þó hægara sagt en gert. Sterk réttlætiskennd hennar og gamlar venjur verða til þess að hún fer fljótlega að blanda sér í vandamál nágrannanna, hvort sem þeir vilja hjálp hennar eða ekki.
Serían blandar saman svörtum húmor, spennu og samfélagsádeilu og fjallar meðal annars um eftirlit, réttlæti og hversu langt fólk er tilbúið að ganga í að skipta sér af lífi annarra.
Þættirnir voru framleiddir í samstarfi íslenskra og franskra aðila og stór hluti leikarahópsins er íslenskur. Meðal leikara eru Kristín Þóra Haraldsdóttir, Hilmar Guðjónsson, Halldóra Geirharðsdóttir og Björn Thors.
Serían hefur vakið athygli erlendis
Danska konan hefur þegar vakið töluverða athygli utan Íslands. Þættirnir voru heimsfrumsýndir á Series Mania-hátíðinni í Frakklandi árið 2025 og hafa síðan verið sýndir á fleiri alþjóðlegum kvikmynda- og sjónvarpshátíðum.
Erlendir miðlar á borð við Le Monde og Le Figaro hafa einnig fjallað jákvætt um seríuna og frammistöðu Dyrholm.
Tilkynnt hafði verið fyrirfram að Dyrholm fengi Freyjuverðlaun fyrir leik sinn í þáttunum. Sigur Dönsku konunnar sem besta norræna sjónvarpsþáttaröðin var hins vegar ekki kunngjörður fyrr en við verðlaunaafhendinguna sjálfa.
Íslenskt kvikmynda- og sjónvarpsfólk var einnig áberandi á hátíðinni. Ólafur Darri Ólafsson hlaut verðlaun fyrir leik sinn í Reykjavík Fusion og Ebba Katrín Finnsdóttir hlaut sérstök Icebreaker-verðlaun fyrir árangur sinn á alþjóðavettvangi.
Freyjuverðlaunin, eða The Freyas – Nordic Film & TV Awards, eru ný norræn kvikmynda- og sjónvarpsverðlaun sem ætlað er að auka sýnileika norræns efnis og fólksins á bak við það. Fyrsta hátíðin fór fram í Helsinki og stendur til að verðlaunaafhendingin ferðist milli Norðurlandanna á næstu árum.
