Leikarinn Sacha Baron Cohen fer með hlutverk Freddie Mercury í væntanlegri kvikmynd um tónlistarmanninn. Cohen er í óðaönn þessa dagana að undirbúa sig fyrir hlutverkið og er talið að hann sé í strangri söng- og raddkennslu til þess að ná hreim og blæbrigðum Mercury.
Cohen er mjög skipulagður og er haft eftir vitorðsmanni að hann hafi horft á hundruði klukkustunda af efni með hljómsveitinni Queen og er vitað mál að sviðsframkoma forsprakkans var engri lík.
Gossip Girl stjarnan Blake Lively verður mótleikkona Cohen og leikur hún þáverandi kærustu Mercury.
Cohen er mikill aðdáandi Mercury og er hann staðráðinn að koma hlutverki sínu sem best til skila. Tökur hefjast síðla árs en ekki er víst á þessari stundu hvort Cohen muni syngja eða hvort verði notast við gamlar upptökur.
Ekki er heldur vitað hvort myndin verði æviágrip eða viss saga um ákveðin tímamót í lífi Mercury.
