„Klipparar IceGuys kvikmyndarinnar, þeir Heimir Bjarnason og Jónas Bragi Þórhallsson, eru búnir að þekkjast síðan í grunnskóla. Þeir voru einnig saman í Verslunarskólanum, gerðu myndbönd og voru virkir í félagslífinu.
Jónas segist snemma hafa ákveðið að læra kvikmyndagerð. „Ég og tvíburabróðir minn lærðum kvikmyndatökur í London,“ segir Jónas.
Hann segir að áherslan hafi síðar færst yfir í eftirvinnslu og hann hafi starfað við fagið í Bandaríkjunum eftir Lundúnadvölina. „Við Heimir byrjuðum svo að klippa saman fyrir fjórum árum síðan.“
Meðal verkefna sem Jónas og Heimir hafa unnið saman er Systraslagur, þættir um kvennalandsliðið í fótbolta. Þá klipptu þeir heimildamyndina “Eitt stig í einu” sem var sýnd á Sjónvarpi Símans.
Samhliða IceGuys hefur tvíeykið unnið að þáttum um íslenska karlalandsliðið í handbolta sem sýndir verða á RÚV um Jólin. „Við Hannes Halldórsson höfum umsjón með þeim þáttum og við Jónas klippum saman,“ segir Heimir og bætir við að einnig sé væntanleg á næsta ári heimildarmyndin Dansandi línur sem hann framleiðir og Friðrik Þór Friðriksson leikstýrir. Hún fjallar um Karl Guðmundsson myndlistarmann á Akureyri.
Gott að fá strax viðbrögð
Spurðir að því hvort að það sé gott fyrirkomulag að vinna saman í klippingum játa þeir því. „Það er miklu betra því þá fáum við strax viðbrögð. Við erum saman inni í verkefninu og sjáum hvað hvor okkar er að gera, líkt og menn þekkja úr Google Docs.“
Stuttmyndir sem þeir félagar unnu í grunnskóla voru oft með hasar- og grínívafi. Þeir segja að sú reynsla hafi skilað sér við klippiborðið.
Atriði úr IceGuys – Kvikmyndin
Jónas segir að styrkleikar hvors um sig nýtist vel. „Við vinnum mjög vel saman. Ég hef verið mikið í auglýsinga- og tónlistarmyndbandaheiminum þar sem allt er mjög hratt klippt. Heimir hefur reynslu af öðru tempói eins og úr heimildamyndum og slíku sem eru með gríðarlega langan vinslutíma. Stundum þarf að klippa mörg hundruð klukkutíma niður í tvo.“
Spurðir út í hvernig IceGuys kvikmyndin kom á þeirra borð segir Heimir að þeir Jónas hafi unnið mikið í gegnum tíðina með framleiðslufyrirtækinu Atlavík sem gerði IceGuys kvikmyndina. „Við höfum unnið t.d. Bannað að hlæja sjónvarpsþættina og Systraslag eins og við minntumst á áðan.“
Iceguys – kvikmyndin 2026
Þegar strákasveitin ICEGUYS villist óvart inn í alþjóðlegu raunveruleikakeppnina Battle of the Boybands, neyðast þeir til að keppa við aðrar strákasveitir til að tryggja sér opnunarpláss á tónleikaferðalagi hinnar…
Bíómyndir alltaf draumurinn
Þeir segja það alltaf vera drauminn að gera bíómyndir. „Það er náttúrulega toppurinn. Það er æðislegt að vinna í heimildaefni og því öllu en maður er í þessu fyrir bíóið. Þannig að augljóslega er IceGuys – Kvikmyndin bara geðveikt og mjög skemmtilegt verkefni.“
Spurðir að því hvort IceGuys sé fyrsta kvikmyndin sem þeir geri segir Heimir að hann hafi leikstýrt og klippt kvikmyndina Þrot frá árinu 2023. „Ég klippti bíómynd sem heitir Chapel sem kom út á streymisveitum í Bandaríkjunum.
RÚVÞeir segjast gjarnan horfa á gamlar kvikmyndir til að fá hugmyndir, til dæmis grín – og íþróttamyndir frá tíunda áratug síðustu aldar. „Í tengslum við IceGuys horfðum við t.d. á Dodgeball, Blades of Glory og svoleiðis myndir,“ segir Jónas og brosir.
Inntir eftir því hvort leikstjórarnir, Hannes Þór Halldórsson, Hannes Arason og Allan Sigurðsson, hafi verið mikið með þeim í klippiherberginu segja þeir Heimir og Jónas að klippivinnan hafi byrjað meðan kvikmyndin var enn í tökum. „Svo fáum við bara ákveðinn tíma til að henda upp einhverju uppkasti, einhverjum bútum sem við sýnum svo leikstjórunum. Við setjumst ekkert saman niður með þeim fyrr en fyrsta grófklippið er tilbúið.“
Klippivinnan hófst í júní síðastliðnum.
Nokkrar nætur í klippiherberginu
„Eftir að fyrsta grófklippið er tilbúið er samstarfið með leikstjórunum mjög náið. Það voru einhverjar nætur sem við vorum hér á fullu með þeim. Menn eru ekki alltaf sammála í klippiferlinu og það geta komið upp ýmis álitamál. Leikstjórar eiga lokaorðið en við reynum auðvitað að berjast fyrir okkar skoðunum. En það er oft þannig að besta hugmyndin sigrar að lokum, sama hvort hún kemur frá leikstjórum eða klippurum”, segir Heimir.
Þeir segja það hafa verið mikinn kost að leikstjórarnir hafi reynslu af klippingum sjálfir. „Það er gott því þá tala allir sama tungumálið.“
Spurðir um fyrirmyndir í faginu nefna þeir hinn goðsagnakennda Walter Murch sem klippti myndir eins og Apocalypse Now eftir Francis Ford Coppola og The Godfather þríleikinn eftir saman leikstjóra. „Murch klippir standandi. Kannski er það ástæðan fyrir því að ég er með rafmagnsskrifborð sem hægt er að hækka,“ segir Heimir og brosir.
Heimir nefnir einnig Sally Menke sem klippti fyrir Quentin Tarantino. „Því miður lést hún fyrir aldur fram og annar tók við keflinu. Maður sér það líka á myndunum. Það er aðeins meiri fita á nýrri kvikmyndunum.“
Jónas kveðst hafa fengið mikinn innblástur frá klippurum á borð við Vinnie Hobbs, Troy Charbonnet og Blaize Fobbe sem hafa verið umfangsmiklir í auglýsinga- og tónlistarmyndbandaheiminum.
Pínu hallærislegir
En aftur að IceGuys. Þeir Jónas og Heimir segja að það hafi verið sérstaklega mikil áskorun að klippa myndina því það er raunveruleikaþáttur inni í henni miðri „Maður þurfti aðeins að hugsa um hvernig dæmigerðir raunveruleikaþættir væru klipptir. Þeir eru oft svona pínu hallærislegir,“ segja þeir Jónas og Heimir að lokum.“
