Tónlistarunnendur geta farið að hlakka til haustsins því Sambíóin hefja í ágúst nýja sýningaröð undir nafninu Bíótónar, þar sem sígildar tónlistar- og tónleikamyndir frá ólíkum tímabilum verða sýndar á hvíta tjaldinu í Sambíóunum Kringlunni.
Fimm myndir eru á dagskrá frá ágúst og fram í febrúar. Þar verður ferðast í gegnum nokkra áratugi tónlistarsögunnar, allt frá Woodstock-hátíðinni og kveðjutónleikum The Band yfir í tónlist Prince, The Who og Pink Floyd.
Scorsese ríður á vaðið með The Last Waltz
Fyrsta mynd Bíótóna verður The Last Waltz (1978) sem verður sýnd 26. ágúst.
Tónleikamynd Martin Scorsese fjallar um kveðjutónleika The Band, sem haldnir voru í Winterland Ballroom í San Francisco á þakkargjörðardaginn árið 1976.
Gestalistinn var ekki af verri endanum. Bob Dylan, Neil Young, Joni Mitchell, Eric Clapton, Van Morrison, Muddy Waters, Neil Diamond, Ringo Starr og Ronnie Wood voru meðal þeirra sem stigu á svið með hljómsveitinni.
Myndin kom út árið 1978 og hefur síðan orðið ein þekktasta tónleikamynd síns tíma.
Woodstock á hvíta tjaldið
Þann 28. september verður Woodstock (1970) sýnd. Heimildarmynd Michaels Wadleigh fjallar um Woodstock-tónlistarhátíðina sem haldin var í New York-ríki í ágúst 1969.
Myndin fylgir bæði tónleikunum og fólkinu sem sótti hátíðina. Þar koma meðal annars fram Jimi Hendrix, The Who, Santana, Joe Cocker, Crosby, Stills & Nash og Joan Baez.
Woodstock kom út árið 1970 og hlaut Óskarsverðlaun fyrir bestu heimildarmynd.
Prince, The Who og Pink Floyd
Þann 26. október verður komið að Purple Rain (1984) með Prince í aðalhlutverki. Myndin er að hluta byggð á reynslu hans úr tónlistarlífinu í Minneapolis og blandar saman leikinni sögu og tónlistarflutningi.
Samhliða myndinni kom út samnefnd plata Prince and the Revolution. Meðal laga í myndinni eru Purple Rain, When Doves Cry, Let’s Go Crazy og I Would Die 4 U. Tónlistin úr Purple Rain hlaut meðal annars Óskarsverðlaun.
Þann 16. nóvember tekur Tommy (1975) við, kvikmyndaútgáfa Ken Russell á samnefndri rokkóperu The Who frá árinu 1969.
Roger Daltrey fer með titilhlutverkið en einnig koma fram Ann-Margret, Oliver Reed, Elton John, Tina Turner og Eric Clapton. Pete Townshend hafði umsjón með tónlist myndarinnar og meðal þekktustu laga verksins eru Pinball Wizard, I’m Free og See Me, Feel Me.
Bíótónar halda síðan áfram á nýju ári þegar Pink Floyd: The Wall (1982) verður sýnd 22. febrúar 2027.
Mynd Alan Parker byggir á plötunni The Wall sem Pink Floyd gaf út árið 1979. Alan Parker leikstýrði eftir handriti Roger Waters og Bob Geldof fer með aðalhlutverkið. Myndin blandar saman leiknum atriðum og eftirminnilegum teiknimyndaköflum Gerald Scarfe.
Tónlist Pink Floyd er burðarás myndarinnar og þar má meðal annars heyra Another Brick in the Wall (Part 2), Comfortably Numb og Run Like Hell.
Dagskrá Bíótóna
26. ágúst
The Last Waltz (1978)
The Last Waltz (1978)
8.1 
8/10 28. september
Woodstock (1970)
Woodstock (1970)
8.1 8/10 26. október
Purple Rain (1984)
Purple Rain (1984)
6.5 7/10 Aðgengilegt á Íslandi
16. nóvember
Tommy (1975)
Tommy (1975)
6.6 6/10 22. febrúar 2027
Pink Floyd: The Wall (1982)
Pink Floyd: The Wall (1982)
8.0 8/10 Allar myndirnar verða sýndar í Sambíóunum Kringlunni og gefst þar gott tækifæri til að upplifa þessar sígildu tónlistarmyndir aftur þar sem þær njóta sín hvað best, á stóra tjaldinu.
Á Kvikmyndir.is má auðvitað svo fylgjast með sýningum á eldri og sígildum kvikmyndum undir Nostalbíó.