Ný stórmynd Steven Spielberg, Disclosure Day, er ekki bara enn ein sci-fi mynd um geimverur. Hún kemur út á mjög sérstökum tímapunkti, nú þegar bandarísk stjórnvöld hafa birt UFO/UAP skjöl, myndbönd og vitnisburði sem hafa vakið mikla umræðu um dularfull fyrirbæri á himni.
Þetta hefur vakið athygli víða á netinu.
Undanfarnar vikur hefur Pentagon birt tugi skjala og myndbanda sem innihalda lýsingar á svokölluðum „ljóskúlum“, „diskum“ og öðrum óútskýrðum fyrirbærum sem bandarísk yfirvöld kalla nú Óþekkt afbrigðilegt fyrirbæri (e. Unidentified Anomalous Phenomena UAP) Sum skjölin ná allt aftur til ársins 1948.
UFO stendur fyrir Unidentified Flying Object, eða Óþekktur fljúgandi hlutur.
Í einni nýrri skýrslu lýsir háttsettur bandarískur leyniþjónustumaður því hvernig hann varð vitni að „ótal appelsínugulum kúlum sem sveimuðu í allar áttir“ yfir heræfingasvæði árið 2025. Fyrirbærin voru sögð hreyfast á miklum hraða og mynda þríhyrningslaga form áður en þau hurfu sporlaust.
Bandarísk stjórnvöld hafa þó tekið fram að skjölin sanni ekki tilvist geimvera eða tæknibúnaðar sem á uppruna sinn utan jarðar. Samt hefur umræðan um UFO og UAP færst mun meira inn í almenna umræðu síðustu ár, frá internetspjallborðum yfir í umræður á þingi, fréttamiðla og opinber gögn frá Pentagon.
Á sama tíma er Spielberg að fara að frumsýna Disclosure Day, mynd sem fjallar bókstaflega um hvað myndi gerast ef einhver myndi leka öllum leynigögnum heimsins um UFO fyrirbæri í einu risastóru upplýsingaflóði yfir allan heiminn.
„Hvað myndi gerast ef einhver hefði aðgang að öllum sönnunargögnum síðustu 80 ára og myndi birta þau öll í einu?“ sagði Spielberg í nýlegu viðtali við CBS News. Það er því kannski ekki skrýtið að internetið sé byrjað að spinna ýmsar samsæriskenningar í kringum myndina.
Á Reddit og öðrum samfélagsmiðlum hafa margir velt því fyrir sér hvort tímasetningin sé raunverulega bara tilviljun. Í áratugi hafa verið til kenningar um að Hollywood sé stundum notað til að „undirbúa“ almenning fyrir ákveðnar hugmyndir eða mögulegar opinberanir í framtíðinni. Spielberg hefur þó sjálfur hafnað þeim hugmyndum.
„Ég er ekki að gefa í skyn að ég viti eitthvað,“ sagði leikstjórinn hlæjandi á rauða dreglinum í London. Hann segir myndina byggða á heimildarmyndum, opinberum vitnisburðum og þeirri UFO umræðu sem hafi orðið sífellt stærri síðustu ár. Handritshöfundurinn David Koepp fór þó aðeins lengra og sagði eftir rannsóknarvinnu fyrir myndina að hann væri orðinn sannfærður um að stjórnvöld hafi ekki verið fullkomlega hreinskilin um UFO mál í áratugi.
Hvort sem um tilviljun sé að ræða eða ekki, þá virðist Disclosure Day koma út á mjög sérstökum tímapunkti. Geimveruumræðan er ekki lengur bara eitthvað fyrir jaðarhópa eða spjallþræði á netinu. Hún er komin inn í bandaríska þingið, Pentagon skjöl og stærstu fréttamiðla heims.
Disclosure Day er frumsýnd næsta miðvikudag, 10. júní, í helstu kvikmyndahúsum landsins.
Disclosure Day (2026)
8/10 Heimildir:
CBS News: „Disclosure Day“ director Steven Spielberg on aliens: „I absolutely think that they have been here, and they are here.“
Metro: Steven Spielberg rejects Disclosure Day alien conspiracy theories
BBC: US government releases UFO sighting reports – ‘Orbs swarming in all directions’