Frægar persónur sem endurspegla stjörnumerkin 12
Hvaða stjörnumerki myndu þessar þekktu kvikmyndapersónur falla undir? Hér er skemmtilegt yfirlit þar sem hvert merki er parað við tvo eftirminnilega karaktera sem endurspegla eiginleika þess á sinn hátt.
Hrúturinn
Leonidas (300) og Furiosa (Mad Max: Fury Road)
Hrúturinn er hreinn og beinn, hugrakkur og fer fyrstur í orrustuna. Leonidas og Furiosa eru leiðtogar sem bíða ekki eftir leyfi. Þau taka frumkvæði og keyra áfram af fullum krafti. Þar birtist kjarni Hrútsins skýrt.
Nautið
James Bond og Miranda Priestly (The Devil Wears Prada)
Nautið er rólegt, yfirvegað og með smekk fyrir gæðum. Bond lifir í lúxus og heldur alltaf ró sinni. Miranda hefur byggt upp sterka ímynd og óumdeilanleg áhrif í tískuheiminum með stöðugri og afgerandi nærveru. Þetta eru karakterar sem bera með sér sterka Nautsorku.
Tvíburarnir
Jack Sparrow (Pirates of the Caribbean) og Harley Quinn (The Suicide Squad)
Tvíburinn er óútreiknanlegur, skemmtilegur og virkar oft eins og hann sé með plan, en spinnur yfirleitt eitthvað í augnablikinu. Jack Sparrow og Harley Quinn eru leikandi létt, snögg og óreiðukennd sem gerir þau ómótstæðilega sjarmerandi. Þar kemur tvíburaorkan skýrt fram.
Krabbinn
Don Lockwood (Singin’ in the Rain) og Sophie (Mamma Mia!)
Krabbinn er tilfinningaríkur, hlýr og tengir fólk saman. Don og Sophie tjá sig af einlægni og smita aðra af gleði og hjartahlýju. Það er einmitt þessi hlýja sem skilgreinir Krabbann.
Ljónið
Tony Stark (Iron man) og Maria (The Sound of Music)
Ljónið skín skært og dregur athygli að sér án fyrirhafnar. Tony Stark gerir það með sjálfstrausti og húmor. Maria geislar náttúrulega og lýsir upp umhverfið sitt með gleði og hlýju. Þau bera með sér ómótstæðilega ljónsorku.
Meyjan
Dexter Morgan og Monica Geller (Friends)
Meyjan sér smáatriðin sem aðrir missa yfirleitt af. Hún skipuleggur, greinir og vill hafa allt á sínum stað. Dexter lifir eftir ströngu kerfi. Monica vill hafa allt hreint og í röð og reglu. Þetta er Meyjan í sinni tærustu mynd.
Vogin
Juror #8 (12 Angry Men) og Clarice Starling (The Silence of the Lambs)
Vogin leitar jafnvægis og sannleika. Hún hlustar, vegur og metur áður en hún tekur afstöðu. Juror 8 og Clarice starfa út frá sterkri réttlætiskennd og þurfa stöðugt að halda jafnvægi milli ólíkra sjónarmiða og í erfiðum aðstæðum. Þar birtast einkenni Vogarinnar skýrt.
Sporðdrekinn
Aragorn (The Lord of the Rings) og Mary Poppins
Sporðdrekinn er djúpur og dulur með sterkan innri kraft og er náttúrulegur leiðtogi. Hann er oft misskilinn og tengist umbreytingu, dauða og endurfæðingu. Aragorn dvaldi lengi í skugganum sem Strider, ber styrk sinn með ró og þögn og rís að lokum upp sem konungur. Mary Poppins hefur fulla stjórn, er dularfull og ber með sér umbreytingarkraft sem erfitt er að útskýra. Hún kemur, umturnar öllu og hverfur aftur þegar verki hennar er lokið. Þetta er Sporðdrekinn í sinni dýpstu mynd.
Bogmaðurinn
Indiana Jones og Bella Baxter (Poor Things)
Bogmaðurinn er ævintýragjarn og forvitinn. Ef ævintýri hefði nafn væri það Indiana Jones, sem eltir hvert ævintýrið á fætur öðru með ástríðu fyrir fornleifum. Bella Baxter uppgötvar heiminn með opnum huga og óþrjótandi forvitni. Þessir eiginleikar gera þau að fullkomnum Bogamönnum, hvort á sinn einstaka hátt.
Steingeitin
Andy Dufresne (The Shawshank Redemption) og Maya (Zero Dark Thirty)
Steingeitin er þrautseig, metnaðarfull og markviss. Hún vinnur hægt og gefst ekki upp. Andy er fyrrum bankamaður sem sýnir ótrúlega seiglu og þolinmæði, og Maya heldur áfram í erfiðu verkefni sama hvað það kostar eða hversu langan tíma það tekur. Þetta lýsir Steingeitinni vel, þau halda áfram þar til markmiðinu er náð.
Vatnsberinn
Captain Kirk (Star Trek) og Ellen Ripley (Alien/s)
Vatnsberinn fer sínar eigin leiðir og fylgir eigin sannfæringu. Kirk treystir innsæinu og tekur áhættu. Ripley stendur ein og lætur ekki segja sér fyrir verkum. Þau fara sínar eigin leiðir, sama hvað það kostar
Fiskarnir
Forrest Gump og Amélie
Fiskarnir eru næmir, draumkenndir og fylgja hjartanu. Forrest og Amélie sjá fegurðina í litlu hlutunum og lifa í eigin tilfinninga og draumaheimi. Þau minna á að það er oft í einfaldleikanum sem mesta merkingin felst.
