Írsku Eurovision-tvíburarnir John og Edward – eða Jedward munu fara með hlutverk í framhaldsmyndinni Sharknado 3.
Tvíburnarnir fluttu eftirminnilega lagið „Lipstick“ fyrir hönd Írlands í Eurovision árið 2011.
Fyrri myndirnar um óðu hákarlana hafa fengið misjöfn viðbrögð og er það ekki af ástæðulausu.
Fyrsta myndin fjallar um kraftmikinn hvirfilbyl sem sýgur hákarla úr sjónum og lætur þeim svo rigna á stórborg og fljúga þeir þar um og ráðast á saklaus börn og ljóshærðar stúlkur.
Leikkonan Tara Reid, sem er þekktust fyrir myndirnar The Big Lebowski og American Pie, mun leika í myndinni ásamt tvíburunum. Reid hefur einnig leikið í fyrstu tveim myndunum um reiðu hákarlana.
Sharknado 3 verður frumsýnd seinna á þessu ári.
