Nýjar myndir hafa verið birtar úr gamanmyndinni Gods Behaving Badly, en hún fjallar um þau Kate og Neil sem hitta gríska guði, eins og þau Seif, Afródítu og Persefóníu í New York samtímans, en samskiptin við þá eiga eftir að draga dilk á eftir sér.
Leikstjóri myndarinnar er Marc Turtletaub og handrit skrifar Josh Goldfaden, en myndin er kvikmyndagerð á samnefndri metsölubók Marie Phillips.
Hópur gæðaleikara fer með hlutverk í myndinni, og þar á meðal eru, eins og sést á meðfylgjandi myndum, Christopher Walken í hlutverki Seifs, sem er æðstur guða, John Turturro er Hades, guð undirheima, Sharon Stone er gyðja ástar, fegurðar, nautna og frjósemi, Afródíta, og Oliver Platt er Apolló, guð tónlistar og ljóðlistar.
Meðal annarra leikara eru Alicia Silverstone sem leikur Kate, Ebon Moss-Bachrach er Neil, Rosie Perez er Persefónía, Edie Falco er Artemis, Phylicia Rashad er Demeter, Nelsan Ellis er Díónýsus og Gideon Glick er ástarguðinn Eros.
Ekki hefur enn verið gefinn út frumsýningardagur fyrir myndina.