Fréttablaðið segir frá því í dag að bandaríski kvikmyndaframleiðandinn DreamWorks sé væntanlegur hingað til lands til að taka upp atriði í nýrri mynd um Julian Assange og vefsíðuna WikiLeaks, The Man Who Sold the World.
Samkvæmt heimildum Fréttablaðsins fara tökurnar að öllum líkindum fram í janúar og verða þær í Reykjavík og nágrenni. „Tökuliðið mun dvelja hér í nokkra daga við tökurnar og fara svo af landi brott. Heimildirnar herma að fyrirtækið True North muni aðstoða DreamWorks við tökurnar en hið fyrrnefnda vildi ekki staðfesta neitt um verkefnið. Tökur eru einnig fyrirhugaðar í Berlín og í Belgíu,“ segir í frétt blaðsins.
Hlutverk Assange í myndinni verður í höndunum á Benedict Cumberbatch, sem leikur aðal illmennið í næstu Star Trek kvikmynd, Star Trek Into Darkness. Daniel Brühl leikur talsmanninn Daniel Domscheit-Berg, eftir að James McAvoy þurfti að draga sig í hlé. Dan Stevens úr þáttunum Downton Abbey leikur tölvuhakkara.
Fréttablaðið hefur eftir þingkonunni íslensku Birgittu Jónsdóttur, sem hefur starfað fyrir WikiLeaks, að Cumberbatch og Assange séu mjög líkar týpur. Ekki er búið að ráða leikkonu í hlutverk Birgittu, en nokkrar íslenskar leikkonur koma til greina, samkvæmt Fréttablaðinu. „Mér finnst þetta svolítið óraunverulegt enn þá. Ég vonast til að þetta verði ekki algjör Hollywood-mynd,“ segir Birgitta í blaðinu en hún hefur veitt handritshöfundinum Josh Singer ráðgjöf.
Leikstjóri The Man Who Sold the World verður Bill Condon, sem síðast leikstýrði The Twilight Saga: Breaking Dawn – Part 1 og Part 2.