Ný stikla, brakandi fersk úr bakaraofninum, er komin út fyrir nýjustu mynd handritshöfundarins og leikstjórans John Herzfeld, Reach Me. Ótal þekktir leikarar fara með hlutverk í myndinni, fólk eins og Sylvester Stallone, Kyra Sedgwick, Tom Berenger, Cary Elwes, Thomas Jane, Kelsey Grammer, Danny Aiello og Terry Crews svo einhverjir séu nefndir, en myndin fjallar um hóp fólks sem allt tengist í gegnum sjálfshjálparbók eftir fyrrum fótboltaþjálfara.
Myndin lenti í ógöngum í framleiðsluferlinu. Upprunalegur bakhjarl hætti við á miðri leið, en menn dóu ekki ráðalausir og leituðu á náðir hópsöfnunarsíðunnar Kickstarter og söfnuðu þar 250 þúsund Bandaríkjadölum, og síðar söfnuðust 181 þúsund dalir til viðbótar á Indiegogo.
Myndin verður frumsýnd í október nk.
Kíktu á stikluna hér fyrir neðan:
