Leikna teiknimyndin Space Jam, með þeim Michael Jordan og Kalla Kanínu í aðalhlutverkum mun að öllum líkindum öðlast framhald. 18 ár eru liðin frá því að myndin var frumsýnd og nú áætlar framleiðslufyrirtækið Warner Brothers að gera aðra mynd.
Fyrirtækið hefur fengið til sín framleiðandann Charlie Ebersol til þess að koma verkinu af stað og mun bróðir hans, Willie, sjá um handritsskrifin. Bræðurnir hafa komið að stórum sjónvarpsviðburðum og gert heimildarmyndir, en aldrei gert kvikmynd í fullri lengd.
Körfuboltasnillingurinn LeBron James var sagður leika aðalhlutverkið en forsvarsmenn hans hafa neitað því alfarið við fréttamiðla. Líkt og í upprunalegu myndinnni þá er búist við því að margir af þekktustu körfuboltamönnum NBA verði í framhaldsmyndinni.
Space Jam kom út árið 1996 og þénaði rúma 230 milljónir dala á heimsvísu.