Breski grínistinn Russel Brand er staðfestur í stórt hlutverk í mynd Diablo Cody, Lamb of God, þeirri fyrstu sem hún leikstýrir sjálf. Auk Brand þykir Julianne Hough líkleg í aðalhlutverk myndarinnar. Hún gerði garðinn frægan í Dancing with the Stars (hlýtur hún þá ekki að hafa verið fræg fyrir?) og mun birtast í fyrsta stóra kvikmyndahlutverki sínu bráðlega í endurgerðinni á Footloose.
Hough myndi leika konu sem missir trúna eftir flugslys, og heldur til Las Vegas til þess að lifa lífi syndarans. Einhverntíman á leiðinni öðlast hún svo trúna aftur. Brand leikur mann sem hún hittir á leiðinni. Tökur eru ráðgerðar vorið 2012. Þangað til er önnur mynd eftir Diablo Cody væntanleg, Young Adult, með Charlize Theron í aðalhlutverki og leikstýrt af Jason Reitman, sem gerði einnig Juno. Á meðan eiga þau Brand og Hough eftir að birtast í söngleiknum Rock of Ages, ásamt Tom Cruise, Alec Baldwin og mörgum fleirum stjörnum.