Fyrsta kitlan er komin fyrir þriðju leiknu myndina um hinn alræmda Richard B. Riddick, sem leikinn er af Vin Diesel. Myndin heitir einfaldlega Riddick.
Nú er Riddick fastur á eyðiplánetu eftir að hafa verið svikinn af sínu eigin fólki og berst þar fyrir lífi sínu gegn geimófreskjum og verður sífellt sterkari og hættulegri.
Kitlan, sem hægt er að horfa á hér fyrir neðan, sýnir ekki mikið, en gefur þó smá kitl fyrir það sem koma skal 6. september nk.
Eins og sést í kitlunni á Riddick þarna í höggi við hrikalegar skepnur í eyðilegu og dimmu landslagi, en Riddick hefur þann eiginleika, ásamt því að vera grimmur, sterkur og vígfimur, að hann getur séð í myrkri.
Áður hafa komið út tvær leiknar myndir um Riddick, Pitch Black og Chronicles of Riddick en einnig er til teiknimynd frá árinu 2004, The Chronicles of Riddick: Dark Fury.
Hægt er að fylgjast með fréttum af Riddick í gegnum Facebook síðu myndarinnar.
