Gagnrýni eftir:
The Original Kings of Comedy0 af 0 fannst gagnrýnin hjálpleg
Leiðinlegasta mynd allra tíma. 
Þessir menn eru ekkert fyndnir. Spike Lee er ömurlegur. Ég brosti aldrei, en var nálægt því að fella tár.
Any Given Sunday0 af 0 fannst gagnrýnin hjálpleg
Hrútleiðinleg mynd. 150 mín. af langdregnu röfli um þessa hundleiðinlegu kanaíþrótt - ruðning (sem þeir voga sér að kalla fótbolta). Það er nákvæmlega ekkert sem er skemmtilegt eða áhugavert við þessa mynd. Fólk getur allt eins gert magaæfingar í von um skemmtun eins og að horfa á þessa hörmung. Leiðinlegasta mynd sem Al Pacino hefur leikið í og enn eitt skelfingarútspil hjá hinum mjög svo ofmetna Oliver Stone.
Natural Born Killers0 af 0 fannst gagnrýnin hjálpleg
Mjög svo ofmetin mynd eftir einn allra ofmetnasta leikstjóra samtímans. Það voru allir að tapa sér yfir því hversu margar tegundir af filmum Oliver Stone notaði í þessa mynd og töldu hana góða þess vegna virðist vera. Ég sé aftur á móti ekkert merkilegt við það. Þessi mynd er óttaleg della út í gegn og fátt sem gleður augað. Stöku sinnum var svo sem hægt að hlæja aðeins en það var ekki nóg til að gera þessa mynd neitt annað en enn eitt slakt útspil frá Oliver Stone.
Dark Blue0 af 0 fannst gagnrýnin hjálpleg
Ég verð að játa að þegar ég sá Dark blue varð ég fyrir smá vonbrigðum. Ég átti von á skemmtilegri mynd. Dark blue er samt ljómandi mynd á margan hátt og ég held að engum ætti svo sem að leiðast neitt yfir henni. Það sem hífir hana hinsvegar nokkuð yfir meðallag er frábær frammistaða meistara Kurt Russell í aðalhlutverkinu. Að mínu mati átti hann án vafa óskarstilnefningu skilið fyrir vikið en því miður varð ekki af því. En til þess að mynd verði skemmtileg þarf meira en gallalausn leik og þar vantar Dark blue nokkuð þar sem plottið er fremur þungt og óspennandi. Aðdáendur meistara Russell munu samt ekki fara ósáttir að sofa eftir Dark Blue.
3000 Miles to Graceland0 af 0 fannst gagnrýnin hjálpleg
Ein allra vanmetnasta mynd sem ég hef séð. Allir leikarar eru að standa sig hérna með sóma og sér í lagið töffarinn Kurt Russell. Kevin Costner sem hefur lítið gert að viti lengi á hérna fyrirtaks frammistöðu og hann ætti að velta því all verulega fyrir sér að leika vondu kallana oftar. Sögðuþráðurinn er skemmtilegur og margar eftirminnilegar senur. Ég hefði reyndar viljað heyra fleiri lög með rokkkónginum þar sem myndin tengist honum mikið.
House of 1000 Corpses0 af 0 fannst gagnrýnin hjálpleg
Þetta er nú eitt allra mesta rugl sem ég hef nokkru sinni séð! Söguþráðurinn er álíka asnalegur og hann er ruglingslegur og ætla má að Rob Zombie hafi verið með kveikt í einhverju fleiru en reykelsi þegar hann skrifði þessi ósköp. Allir leikarar eru hörmung, engin óvænt flétta og ekki einu sinni ein svöl sena í myndinni sem flestar hrollvekjur geta þó státað af. Ekkert slíkt hér. Ég hef nú ekki talist mikill aðdáandi sólóferils Rob Zombie í tónlistinni séð en tröll eigi mig ef að hann er ekki bara tær snilld miðað við þennan stutta feril hans sem leikstjóra. Ef Rob vill á einhvern hátt gera komandi kynslóðum jafnt þeim sem nú eru upp greiða þá skal hann hætta þessari vitleysu strax. Það versta við þetta er að myndin er það vond að sennilega verður gert framhald!
While You Were Sleeping0 af 0 fannst gagnrýnin hjálpleg
Hvað getur maður sagt? Þetta er mynd sem enginn karlmaður sér ótilneiddur! Eins dæmigerð rómantísk mynd og hugsast getur orðið, m.ö.o. hundleiðinleg. Ég skil ekki flesta þá sem gera svona myndir, hvers vegna þurfa þær nánast alltaf að vera drepleiðinlegar fyrir hinn dæmigerða karlmann? Notting Hill var undantekning á þessu og mjög lofsvert innlegg í þessar gerðir kvikmynda. En eins og áður sagði er svo sannarlega annað uppá teningnum hér, fólk getur allt eins horft á Pretty Woman í svona tuttugasta skiptið!
Boiling Point0 af 0 fannst gagnrýnin hjálpleg
Ég vil bara vara alla við sem ekki hafa séð hana þessa! Ekki er ólíklegt að finna hana í gamla rekkanum á leigunum og fyrir hasaraðdáendur væri auðvelt að falla í þá gildru að skella sér á hana sökum þokkalegra leikara. Í guðsbænum skulu menn sleppa því vegna þess að þarna er nákvæmlega enga skemmtun að finna. Ég mæli frekar með gömlum Þingsjárþáttum!
Irreversible0 af 0 fannst gagnrýnin hjálpleg
Einhvern veginn fer maður að efast um tilvistarrétt kvikmyndargerðar þegar maður sér slíkan viðbjóð. Þetta er án vafa ógeðslegasta mynd sem ég hef nokkurn tíman séð og ég mæli ekki með því að neinn horfi á hana. Fyrir utan þessi ógeðfelldu ofbeldisatriði sem myndin er fræg fyrir er allt fullt af sjóveikisatriðum þar sem myndavélin er á fullu út um allt og einhver stórskrítinn hljóð undir sem ætla gjörsamlega að æra mann. Þetta tvennt gerir það að verkum að ekki nokkra skemmtun er hægt að fá út úr þessari hræðilegu mynd en aftur á móti fer maður að efast um tilgang lífsins all verulega og ekki get ég séð nokkuð gott við það. 95 mín. 800 krónur og stór hluti á sálu minni sem koma ekki aftur, ALDREI. EKKI SJÁ ÞESSA MYND! Hálfa stjörnu fá leikaranir sem standa sig vel.
Daredevil0 af 0 fannst gagnrýnin hjálpleg
Einhvern veginn verða þessar ofurhetjumyndir aldrei neitt sérstaklega góðar. Þessi mynd er enginn undantekning en þó án vafa í skárri kantinum. Eins og alltaf í slíkum myndum er þarna einhver vondur gaur sem látinn líta mjög ýkt út í þetta skiptið leikinn af Colin Farrell og ljóst er að hann hefur ekki höslað Britney Spears út á þessa frammistöðu. Annars er hann ágætisleikari og ástæða til að horfa framhjá þessari mynd þegar kappinn er metinn. Það besta við myndina er frábær frammistaða einnar efnilegustu leikkonu í Hollywood í dag Jennifer Garner. Hún fer svo sannarlega á kostum og ástæða til að hvetja alla til að sjá myndina hennar vegna.
Half Past Dead0 af 0 fannst gagnrýnin hjálpleg
Þetta er án vafa ein allra besta hasarmynd frá því að Eraser kom út. Seagal snýr hér aftur í sinni bestu mynd ásamt Ja Rule sem er hér að leika í sinni fyrstu mynd og kemst skítsæmilega frá því. Einna helst hefði mátt minnka rappið í myndinni.
Driven0 af 0 fannst gagnrýnin hjálpleg
Þetta er sennilega ein vanmetnasta mynd sem hefur komið út. Ég skora á fólk að láta gagnrýnendur ekki hafa áhrif á sig hér, vegna þess að hinn almenni áhorfandi mun sko verða sáttur. Hér fer Stallone með hlutverks gamalreynds kappakstursökumanns sem lætur sér ekki allt fyrir brjósti brenna og útkoman er samkvæmt því óborganlegur hasar og spenna. Helst má finna myndinni það til vansa að meðleikarar Sly eru frekar af verri endanum og ná engan veginn að fylgja meistaranum sjálfum eftir.
The Scorpion King0 af 0 fannst gagnrýnin hjálpleg
Ef fólk er að leyta að toppafþreyingu þá mæli ég svo sannarlega með þessari. Þarna er á ferðinni bjartasta vonin í hasarmyndageiranum um þessar mundir Dwayne Johnson eða The Rock eins og hann er gjarnan kallaður. Ætla má að hinn mistæki leikstjóri myndarinnar Chuck Russell hafi séð smá Arnold Schwarzenegger í honum þegar vit tökur myndarinnar en eins og allir vita unnu Arnold og Chuck saman í afrekinu Eraser. Þessi mynd er þó ekki jafn góð og hún en varla er nú hægt að ætlast til þess. Rétt er að taka fram að tæknibrellur eru ekki jafn ofnotaðar í þessari mynd eins og The mummy myndunum sem þessi byggir á.
Tequila Sunrise0 af 0 fannst gagnrýnin hjálpleg
Sorglegt að sjá jafn rosalegan klassaleikara og sjálfan Kurt Russell vera í jafn ömurlegri mynd og þessari. Hún er ömurlega langdreginn og leiðinleg á allann hátt. Kurt er hér studdur af Mel Gibson sem er líka í einu af sínum allra verstu hlutverkum. Handritshöfundar hafa líklega verið nýlega búnir að fá jólavisareikninginn þegar þeir hripuðu þessa herlegheit niður.
Starship Troopers0 af 0 fannst gagnrýnin hjálpleg
Ef það verður eitthvað sem Paul Verhoeven stynur upp við andlát sitt reikna ég með því að það verði afsökunarbeiðni til heimsins fyrir að hafa gert Starship Troopers. Það er reyndar lítið mál að fyrirgefa honum þar sem hann gerði meistaraverkin Basic Instinct og Total Recall og með hliðsjón af því veltir maður fyrir sér hverju hann hefur verið á þegar honum datt þetta í hug. Fyrir utan þennan venjubundna pakka sem einkenna lélegar myndir s.s. lélegan leik, slæma karaktersköpun og hörmulega ófrumlegt handrit þá vil ég sérstaklegt taka út verulega hallærisleg fréttaskot sem koma reglulega inní myndina. Þau virðast þjóna mjög litlum tilgangi fyrir utan að auka enn meira við þjóðarrembing bandaríkjanna sem er hreint út sagt viðbjóðslega mikill Starship Troopers. Í örlæti mínu gef ég þó hálfa stjörnu vegna tengsla leikstjórans og eins aðalleikarans, Michael Ironside við Arnold Schwarzenegger. En þeir unnu saman eins og allir vita í Total Recall.
A Nightmare on Elm Street 3: Dream Warriors0 af 0 fannst gagnrýnin hjálpleg
Viðbjóðslegt hvað er hægt að bjóða manni upp á! Þessi er sennilega ein sú allra slakasta myndin úr þessari seríu, og þá er nú mikið sagt. MJÖG lélegir leikarar einkenna myndina, sem er þó ekki það sem ég set mest út á vegna þess að ekki er von á öðru úr hrollvekjugeiranum, heldur er það sú staðreynd að ekkert fengi mann undir nokkrum kringumstæðum að sjá neitt skemmtilegt við söguþráðinn, tæknibrellurnar eða neitt annað sem hefur bersýnilega átt að vera aðlaðandi við mynd þessa. Það er líka með ólýkindum að leikstjórinn Chuck Russell hafi náð að gera meistarastykki eins og Eraser eftir að hann gerði þessa hörmung, en sennilega var heppnaðist Eraser bara svona vel vegna góðra ábendinga frá sjálfum Arnie sem eins og allir vit lék þar aðalhlutverkið. Engum vil ég hinsvegar svo illt að sjá þessa og eina ástæðan fyrir því að hún fær hálfa stjörnu er tenging leikstjórans við Arnold Schwarzenegger!!!
The Fast and the Furious0 af 0 fannst gagnrýnin hjálpleg
Þessi mynd er ein af þessum óskiljanlegu smellum sem enginn fær botn í. Myndinn hefur ekkert sem góða mynd þarf að príða, t.d. eru allir leikararnir skelfilegir og sérstaklega tel ég ástæðu til að nefna grátlega frammistöðu Vin Diesel sem af einhverjum illskiljanlegum ástæðum virðist vera að hasla sér verulegan völl fyrir kvikmyndaleik. Ekki er hægt að segja að The fast and the furious bjóði upp á mikla spennu þar sem mjög svo fyrirsjáanlegt plott myndarinnar fer með eindæmum mikið í taugarnar á manni. Ég tel ástæðu til að vara við þessari sem um innrás USA í Írak væri um að ræða!!!!!
Spice World0 af 0 fannst gagnrýnin hjálpleg
Það er ekki laust við að þær fyrrverandi vinkonur í spice girls hafi greinilegt vitað að þær væru ofur útgáfa af one hit wonder þegar þær ákváðu að gera þessa hörmulegu mynd til að blóðmjólka örugglega alla peninga sem þær gætu hugsanlega fengið úr úr þessari hörmulegu hljómsveit! Handritið er ekki neitt og byggist myndinn fyrst og fremst um að sína þær stelpurnar í sem flestum tegundum af fatnaði. Þó eru nokkrir hnittnir punktar í myndinni sem vert er að brosa af. Myndinni er leikstýrt af manni sem heitir Bob Spiers og ekki veit ég til þess að hann hafi spilað gott mót í kvikmyndaiðnaðinum eftir þetta og er ég ekki hissa eftir þessa ömurlegu byrjun. Það langbesta við myndina er gamla kempan Roger Moore sem er í litlu, en skemmtilegu hlutverki í myndinni. Enn er ég þó ekki búinn af fatta hvernig var hægt að tala hann inn á að leika í þessum óhroða en líklega er þetta glöggt merki um lækkandi frægðarsól hans enda kappinn á áttræðisaldri. Að síðustu vil ég benda á hversu miklu hefði mátt bjarga ef að Stallone hefði leikið smá hlutverk hér, og þá helst sem elskhugi einhverrar í hljómsveitinni!
Get Carter0 af 0 fannst gagnrýnin hjálpleg
Aldrei bregst nú blessaður Stallone! Hér er komin mynd sem er með miklum 70´ brag enda endurgerð á mynd sem kom út um það leiti og ekki laust við að þetta sé ólíkt flestu sem Sly hefur gert áður. Engu að síður er sú gillta regla kvikmyndanna að allt sem Sly kemur nálægt verði að gulli, greinilega enn í fullu gildi. Þetta er ekki mikil hasarmynd fyrir þá sem eru að leyta að því en myndin gengur út á frábært plott sem byggist á góðu handriti þar sem hvert óvænt atriðið kemur á fætur öðru. Ég mæli með þessari fyrir alla karlmenn, en ekki konur þar sem Sly leikur yfirleitt ekki í myndum sem falla þeim vel í geð og ekki er nein breyting hér á.
Total Recall0 af 0 fannst gagnrýnin hjálpleg
Það er enginn annar en góðkunni leikarinn Arnold Schwarzenegger sem fer með aðalhlutverkið í þessari margslungnu framtíðarmynd sem allir hreinlega verða að sjá. Hann er hér vel studdur af Golden globe vinningshafanum Sharon Stone og manninum sem fæddur er sem illmenni,Michael Ironside! Það er ekki laust við að yfirleitt sé framtíðarplottið oft ekki merkilegt, en í þessari mynd er ekki svo því að þetta gengur príðisvel upp í alla staði eins og venjan er með myndir sem Arnie leikur í. Hasarinn nær svo hámarki með frábærum endi sem er þess eðlis að maður getur ekki annað en hugsað um hvort höfundar usual suspects hafi haft þessa mynd í huga þegar þeir gerðu handritið af þeirri ágætu mynd! En uppúr stendur stórleikur Arnie sem hefur um árabil verið einn allra vanmetnasti leikari í Hollywood!
Eraser0 af 0 fannst gagnrýnin hjálpleg
Það er enginn annar en hinn stórkostlegi skapgerðarleikari Arnold Schwarzenegger sem fer með aðalhlutverkið í þessari frábæru spennumynd! Þetta er svona nokkuð venjulegt leyniþjónustuplott sem gegnur svo sannarlega upp. Arnie er hér vel studdur af hinum ágæta leikara James Caan sem stendur sig með príði. Hnittinn og skemmtilegur húmor er á sínum stað hjá Arnie eins og venjan er og hann er svo ekki heldur feiminn að slátra einum og einum manni sem er eitthvað að flækjast fyrir honum. Ég tel þetta eina af bestu myndum þessa tímamótaleikara og kemst hún í klassa með myndum eins og Heat og Cliffhanger!
Save the Last Dance0 af 0 fannst gagnrýnin hjálpleg
Ég get ekki orða bundist yfir því hversu oft er hægt að bjóða kvikmyndaunnendum upp á sömu myndirnar. Það er ekki laust við að mér hafi ég fundist hafa séð þessa oft áður þó svo hafi ekki verið. Hver kannast ekki við stelpuna sem flytur í nýtt umhverfi og er ekkert sérlega vel tekið af fólkinu í kringum hana en nær svo aldeilis að rétta úr kútnum og spila gott mót á flestum sviðum. Þetta er eins ófrumlegt og kostur er. Ég skammast mín sem alvöru karlmaður að hafa séð hana þessa!
Close Encounters of the Third Kind0 af 0 fannst gagnrýnin hjálpleg
Ég hef aldrei skilið hvers vegna þessi mynd þykir svo góð. Þetta er langdreginn hringavitleysa sem ég skil ekki að nokkur maður hafi gaman af. Ég sá hana með þónokkrum eftirvæntingum þar sem dómarnir eru nokkuð góðir og ekki spillir fyrir að Spielberg sjálfur sé í leikstjórastólnum. En vonbrigðin voru algjör. Leikarar standa sig að vísu vel en fátt annað sá ég sem átti skilið að nokkur lifandi maður mundi horfa á þetta rugl. Ekki er hægt að tiltaka tæknibrellur vegna þess að Star Wars: A new hope er með miklu betri tæknibrellur og hún kom út sama ár. Það hefði mátt gera myndina skemmtilegri með því að skella Stallone í aðalhlutverkið. Þá hefði myndin verið í það minnsta með alvöru karlmanni í aðalhlutverki en ekki einhverri tepru eins og hann Richard Dreyfuss er. Sly hefði eflaust slegið mann og annan og geimverur jafnvel og komið myndinni á hærra plan, en það gerði Dreyfuss svo sannarlega ekki. Ég tel að hér hafi verið um taktísk mistök að ræða hjá meistara Spielberg eins og myndin er öll hrein mistök.
Rocky0 af 0 fannst gagnrýnin hjálpleg
Ógleymanlegt meistaraverk sem verður minnst sem ein allra besta mynd 20. aldarinnar. Allir sem efast hafa um hæfileika Stallone sem leikara geta horft á þessa og gleymt síðan öllu rugli um að Sly geti ekki leikið, þar sem túlkun hans á boxaranum Rocky Balboa í þessari mynd verður að teljast með meiri leiksigrum kvikmyndasögunnar. Sly fékk reyndar ekki óskarinn fyrir en hlaut engu að síður tilnefningu fyir leiki sinn en sjálfsagt hefur akademíunni fundist nóg að gefa þessari mynd óskarinn fyrir bestu mynd og látið þar við sitja. Myndin nær svo hámarki með einhverju ógleymanlegasta endaatriði sem heimurinn hefur orðið vitni af. Ég tel að allir þeir sem þykjast hafa gaman af kvikmyndum og hafa ekki séð þessa verði að drífa sig ekki seinna en núna á leiguna tryggja sér eintak af þessari fyrir kvöldið.
Marked for Death0 af 0 fannst gagnrýnin hjálpleg
Þetta er ein af þessu fullkomnu hasarmyndum. Nóg af byssum og slagsmálum auk þess sem þessi mynd skartar einhverjum skemmtilegasta leikara síðustu ára, Steven Seagal í aðalhlutverki sem sýnir stabílan leik að venju. Hún missir hálfa stjörnu á því að eins og venjulega hefur Seagal með sér fjöldann allan af lélegum leikurum með sér sem pirrar mann mikið og ætti jafn skólaður leikari og Seagal að hafa vit á því að velja leikara í sama klassa og hann sjálfur. Að síðustu má svo nefna að þessi mynd er ekki síst fyrir alvöru karlmenn!
The Bridges of Madison County0 af 0 fannst gagnrýnin hjálpleg
Augljóslega engir vestrataktar hjá Eastwood í þessari mynd! Á að vera fyndinn til að byrja með en er einungis væmin og á að vera væmin í endann og við þurfum ekki að fara nánar útí þá sálma. Leikarar standa sig ekki vel en sökum óendalega mikils magns af leiðindum sem þessi mynd bíður uppá mæli ég ekki með henni við neinn alvöru karlmann. Eastwood fær samt hálfa stjörnu, bara fyrir að vera hann sjálfur.
The Specialist0 af 0 fannst gagnrýnin hjálpleg
Dásamleg ræma! Enn og aftur sýnir Stallone óumdeilanlega leikhæfileika sína og með ofurkroppinn Stone við hlið sér getur þetta ekki klikkað. Útkoman er samkvæm því, stórkostleg spennumynd sem ætti að höfða til allra sem kunna að gott að meta. Síðan má ekki gleyma framlagi James Woods og ótrúlegt hversu mikið hann hefur vaxið sem leikari síðan í stórmyndinni The cop. Eina ástæðan fyrir því að þessi mynd fær ekki fjórar stjörnur er sorgleg frammistaða Eric Roberts sem sýnir það að þrátt fyrir að almenn skoðun sé á þá leið að hann geti ekki orðið verri en í myndum eins og Blood red og Shadow man, en hann reynir sitt besta í þessari mynd. Luis Llosa stendur sig hér með príði í leikstjórastólnum og sýnir að frumraunin Sniper er ekkert glópalán! Hann heldur sterkt um taumana þrátt fyrir að hann hafi ekki ráðið við Eric Roberts hér. Það er hiklaust hægt að seta þessa mynd í sama klassa og myndir eins og Dr. No, Bond myndina klassísku og The french connection með Gene Hackman! Enginn alvöru karlmaður yrði svikinn!
Pearl Harbor0 af 0 fannst gagnrýnin hjálpleg
Ég held að einhver vinur kvikmyndaiðnaðarins ætti að taka sig til og taka Jerry Bruckheimer úr umferð með einum eða öðrum hætti. Þessar myndir hans eru byrjaðar að vera slíkar dellur að það hálfa væri mikið meira ein nóg. Þetta er án vafa mesta vindhögg kvikmyndasögunnar, fáránlega löng ástarvella sem er eins og búast mátti við brjálæðislega væmin. Taka skal fram að ég varð ekki fyrir neinum vonbrigðum þó þar sem ég vissi að um Bruckheimer væri að ræða. Árásin er það eina þolanlega í þessari mynd sem ég mæli með að fólk forðist eins og flestar aðrar myndir Jerry Bruckheimer (í það minnsta þessar nýjustu).
Flawless0 af 0 fannst gagnrýnin hjálpleg
Þessa mynd er svo sannarlega skemmtilegra að horfa á en að gera ekki neitt! Þetta þýðir þó ekki að hún sé mjög góð. Sagan er fremur leiðinleg og ekki til þess fallin að gera úr henni mjög skemmtilega mynd. Þeir Robert De Niro og Philip S. Hoffman standa sig þó með stakri príði eins og við mátti búast og eiga þeir fyllilega tvær stjörnur skilið. En engu að síður, ekki skemmtileg mynd svo að þessar tvær duga.
Valentine0 af 0 fannst gagnrýnin hjálpleg
Nú getur fólk sem leggur leið sýna reglulega á videoleigur farið að vara sig því í misgripum gæti það hræðilega slys hent að taka Valentine! Þetta er án vara lélegasta mynd sem kemur á myndband árið 2001 og eflaust þótt önnur ártöl verði skoðuð. Myndinn er stútfull af afleitum leikurum, og enn sannast sú gyllta regla kvikmyndafræðinnar að því verra sem handritið er, því mun meira af fallegu kvenfólki! Það er einmitt þetta fallega kvenfólk sem fær hálfa stjörnu að þessu sinni, en ekki vegna leikhæfileika, heldur vegna þess að þeim tókst að gleðja augu mín á annan hátt. Reyndar var gleði mjög fjarri huga mínum eftir að hafa horft á þessa mynd, vegna þess að ég skemmti mér mínus auk þess sem ég drakk diet kók með!
Rambo: First Blood Part II0 af 0 fannst gagnrýnin hjálpleg
Óendanlegt meistaraverk sem mun aldrei gleymast! Þetta er hin fullkomna spennumynd þar sem Stallone fer gjörsamlega á kostum í hlutverki John J. Rambo, bitrum hermanni sem örlaugin hafa leikið grátt. Hasaratriðin eru frábær og ekki laust við að myndin í heild beri þess merki að snillingurinn James Cameron hafi komið þar nálægt en hann er annar handritshöfundurinn ásamt Sly sjálfum. Það eru nú segin saga að ef annar hvor þessi maður kemur nálægt kvikmynd verður hún að gulli svo það þarf ekki að spyrja að því ef að þeir eru báðir að verki! Myndin nær góðu flugi í margslungnu plotti sem endar síðan með hjartnæmri ræðu Rambo í lokin þar sem Stallone sýnir það og sannar hversu óumdeilanlegri fullkomnun hann er búinn að ná sem leikari. Þetta er sko mynd fyrir alla en þó sérstaklega alvöru karlmenn!
What Women Want0 af 0 fannst gagnrýnin hjálpleg
Það má með sanni segja að Mel Gibson sé að reyna að gjöreyðileggja feril sinn sem leikari. Í það minnsta er hann á leið í svipaða lægð og John Travolta fór í um miðbik níunda áratugarins sem stóð alveg þangað til hann lék í Pulp Fiction. Þessi kenning er byggð á alltof langri röð vondra mynda sem hann hefur leikið í síðastliðinn misseri. Þessi mynd er sennilega sú slakasta hans hingað til. Þetta er fimmta flokks bandarísk ástarvella með agnarlitlu gamansömu ívafi. Mel leikur svo sem þokkalega sem og Helen Hunt sem fer með hitt aðalhlutverkið í myndinni. Helen Hunt virðist ætla að hrifsa titilinn af Meg Ryan um hver leikur í flestum ástarvellumyndum, og ekki er hægt að segja annað en að þessi mynd hjálpi til við það. Í fyrri hluta myndar er hægt að brosa út í annað við og við en fljótlega hætta þær stundir og koma og eftir situr þjáning og volæði. Ekki get ég þó sagt til um endinn þar sem ég slökkti þegar um það bil 5 mín. voru til enda myndarinnar, ég þoldi bara ekki meira. Mynd sem er í það minnsta ekki fyrir alvöru karlmenn!
Batman Returns0 af 0 fannst gagnrýnin hjálpleg
Þessi mynd hefur nánast allt sem hræðileg mynd þarf að geyma. Leikstjórinn Tim Burton virðist reyna hér að eyðileggja feril sinn gjörsamlega og merkilegt þykir mér hvað hefur ræst úr honum síðan miðað við að hafa gert þessa hörmulegu mynd. Hann náði hér að smala saman góðum hópi leikara sem virðast ná furðu góðri samstöðu um að standa sig illa og ber þar fyrst að nefna Danny DeVito sem er vægast sagt hörmulegur í hlutverki mörgæsinnar. Hafa verður þó í huga að hann hefur nú svo sem ekki úr miklu að spila, en gerir það illa sem hann fær. Ég ætla að ljúka þessu með að koma á framfæri ósk minni um að ekki verði gerðar fleiri myndir af þessari hörmulegu seríu, en nú í dag eru þær orðnar fjórar og hverri annarri lélegri, nema ef vera skildi fyrsta myndin sem var þokkaleg. Þetta er hörmung sem allir ættu að missa af.
The Quest0 af 0 fannst gagnrýnin hjálpleg
Enn ein hörumungin sem Van Damme sendir frá sér. Að þessu sinni er um að ræða mynd sem hann segist sjálfur hafa dreymt um að gera frá barnæsku. Eftir að hafa horft á myndina skilur hann svo áhorfendur eftir í óvissu yfir því hvers vegna það er vegna þess að myndinn er svo vond að svarti dauði þykir ekki merkilegur miðað við slíkar hörmungar. Það mætti halda að ásetningur Van Damme hafi verið að gera hálfgert framhald af Bloodsport, sem var ein af hans fyrstu myndum og færði honum frægð, vegna þess að myndin gengur út á svipaðan hlut, þ. E. a. S. keppni milli manna með mismunandi slagsmálaaðferðir. Það þarf ekki að taka fram hversu voðalegan leik Van Damme sýnir, og allir hans meðleikarar þ.á. M. gamli refurinn Roger Moore sem sýnir alls enga gamalkunna takta í sínu leiðinlega hlutverki. Ég tel fulla ástæðu til að benda mönnum frekar á að eyða kvölstund í að leggja hendur sínar í spenntar músagildrur vegna þess að það er a) ódýrara b)skemmtilegra c) veldur minni sársauka.
Timecop0 af 0 fannst gagnrýnin hjálpleg
Það er hreint kraftaverk hversu myndir geta orðið vondar. Þessi virðist þó sprengja skalan gjörsamlega, þar sem verri mynd er tæplega hægt að finna í heiminum í dag. Van Damme virðist ekki getað verið á skjánum eitt einasta augnablik án þess að láta áhorfendur fyllast af viðbjóði yfir því hversu lélegur leikari hann er og sorglegt að vita til þess að þessi maður hafi sankað til sín peningum fyrir að leikia í óhroða sem þessum. Vart verður hægt að segja að myndin hafi snjallt handrit sem bjargi miklu þar sem hörmulegt framtíðarplott er í gangi sem varla er nógu áhugavert til að fá hinn venjulega kvikmyndaáhugamann til að opna augun. Þig skulið forðast þessa sem um miltisbrandsgró væri um að ræða!!!!!
Judge Dredd0 af 0 fannst gagnrýnin hjálpleg
Það má með sanni segja að Stallone stígi aldrei feilspor í vali sínu á kvikmyndum. Þetta meistarastykki er enn ein sönnunin á þessari þumalputtareglu kvikmyndafræðinnar. Þetta er háklassa spennumynd um Judge Dredd (Stallone) sem er allt í senn lögregluþjónn, dómari og framkvæmdarvald. Dredd er í myndinni leikin grátt af illum aðilum sem fá svo síðar í myndinni ærlega fyrir ferðina, í endi sem kemur svo sannarlega öllum á óvart. Það er algjör óþarfi að nefna hverslags hágæðaleik Sly sýnir í myndinni eins og hann er vanur. Myndin er í öruggri leikstjórn af hinum lítt reynda Danny Cannon, sem síðar sendi frá sér I still know what you did last summer og Phoenix, báðar árið 1998 og er ekki ástæða til annars en að vona að hann drífi sig í að senda eitthvað fleira frá sér á næstunni. Það er full ástæða að stökkva á þessa á næstu leigu, sem um lottovinning væri um að ræða.
For a Few Dollars More0 af 0 fannst gagnrýnin hjálpleg
Hreint út sagt stórkostleg mynd. Þetta er að mínum dómi langbesti vestri sem hefur verið gerður hingað til og dreg ég stórlega á efa að nokkurn tíman verði hann slegin út í sínu sviði.
My Big Fat Greek Wedding0 af 0 fannst gagnrýnin hjálpleg
Þunglyndi er það fyrsta sem mér dettur í hug. Joel Zwick hefði frekar átt að snúa sér að skógerð en kvikmyndaleikstjórn. Ekki er ég að skilja þessar vinsældir vegna þess að þetta er álíka frumleg mynd og uppþvotturinn sem ég gerði í gær. Þetta er svipuð ræma og Forces of nature nema með ófríða aðalleikara!
Þá um myndina: feit, ótrúlega hallærisleg, grísk kerling nær sér í karl sem er ekki grískur og í framhaldi af því skapast hundleiðinleg atburðarás sem er ekki vitund fyndin. Ég skemmti mér talsvert betur síðast þegar ég sá Omega!