Message in a Bottle (1999)

Þokkaleg ástarsaga sem segir frá einmanna fráskilinni konu (Robin Wright) sem finnur flösku einn daginn þegar hún er að skokka við ströndina. Í flöskunni eru hjartnæm skilaboð sem einhver hefur skrifað til látinnar eiginkonu sinnar og út frá því vaknar áhugi hjá konunni að hitta manninn sem skrifaði boðin. Auðvitað hefur hún síðan uppi á manninum (Kevin Costner) og þau verða ástfangin en sem fyrri daginn eru ástarsambönd flókin og ekki gengur allt eins og í sögu. Meirihluti myndarinnar fer í þróun sambands þeirra og ég verð að segja að myndin er talsvert langdregin. Ekki vantar að hún sé vel leikin, sérstaklega er Paul Newman góður í sínu hlutverki og er sennilega eitt það besta við myndina. Söguþráðurinn er ekkert meistaraverk og mér fannst þetta með flöskuskilaboðin nú fulldramatískt á köflum. Til þess að fá einhver tilfinningaviðbrögð frá áhorfendum er yfirdrifin notkun á væminni tónlist í myndinni. Ég var ekki mjög hrifinn af endanum heldur, mér fannst áhorfendur eiga betra skilið eftir að hafa fjárfest rúmlega tveim klukkustundum af lífi sínu í myndina. Bærileg afþreying en ekki mikið meira.