Wild Tales (2014)

Hefndin getur verið sæt eða andstyggileg – en í þeim sex sögum sem hér eru sagðar er hún fyrst og fremst drepfyndin, kjánaleg og kómísk. Myndin hefst í flugvél þar sem fólk tekur að spjalla og kemst að því að allir farþegarnir þekkja Pasternak nokkurn. Og allir hafa þeir gert eitthvað á hans hlut. En hefndin er margs konar og í hinum sögum myndarinnar kynnumst við manni sem er í heilagri krossferð gegn stöðumælavörðum Buenos Aires-borgar, sjáum tvo menn berjast til dauða á þjóðvegum eftir að hafa móðgað hvorn annan í umferðaræði og tvær þjónustustúlkur deila um hvort þær eigi að setja rottueitur í matinn hjá kúnna sem reyndist hafa valdið annarri þeirra miklum miska á bernskuárum. Myndinni lýkur svo á brúðkaupi þar sem margs þarf að hefna og margt þarf að fyrirgefa.