Home Run (2013)

Hafnarboltaleikmanni í efstu deild er vikið úr liðinu þegar hann veldur bílslysi undir áhrifum áfengis og er skikkaður til að undirgangast áfengismeðferð sem á eftir að breyta bæði lífi hans og þeirra sem standa honum næst. Það er hinn ágæti leikari Scott Elrod sem fer með aðalhlutverkið í þessari mynd þar sem megináherslan er lögð á góðan og uppbyggjandi boðskap um að það geti allir snúið af rangri braut svo framarlega sem þeir hafa trú á sjálfum sér og bæði hlusta og fara eftir góðra manna ráðum. Corey Brand er vinsæll hafnarboltaleikari hjá liði í efstu deild en hefur gert þau mistök að láta velgengni sína vaxa sér yfir höfuð. Dag einn sest hann drukkinn undir stýri og veldur í framhaldinu alvarlegu bílslysi. Þetta verður til þess að hann er rekinn úr liðinu og skikkaður í áfengismeðferð. Corey telur sig samt ekki eiga við vandamál að stríða en verður að undirgangast meðferðina ef hann ætlar sér að snúa aftur á hafnarboltavöllinn. Smám saman byrjar síðan að renna upp fyrir honum það ljós að ef hann breytir ekki sjálfur viðhorfum sínum stefnir hann rakleiðis í sama farið aftur ...