Serenity (2005)

Hef nú ekki séð Firefly þætti, en eftir að hafa horft á Serenity, verð ég að viðurkenna að maður þarf að sjá þættina ef þeir eru eitthvað svipaðir og myndin. Þessi mynd er snilld, að mínu mati. Útlit myndarinnar er stórkostlegt og ótrúlegt hvað þeir ná að gera góðar brellur í myndinni miðað við kostnað myndarinnar. Hálfgerð blanda af Star Wars og Star Trek. Virkilega hröð og spennandi mynd. Svo fannst mér sagan soldið skemmtileg og persónur myndarinnar mjög góðar. Ef þið ætlið að leigja mynd fyrir kvöldið, mæli ég með að þið sjáið þessa. Snilldarmynd sem kemur hressilega á óvart.

Ég horfði á meistaraverk seinustu helgi, Honogurai mizu no soko kara(Dark water) og hina ágætu Batman Begins. Svo horfði ég einnig á grútleiðinlegar myndir,Underworld og Serenity(sem var reyndar skárri en Underworld). Serenity er byggð á sjónvarpsþáttunum Firefly sem ég hef reyndar aldrei séð og vissi ekkert um en þeir eru gerðir af Joss Whedon sem gerði Buffy(sem ég hef séð nokkra þætti af) og spinoffið Angel(sem ég hef ekki séð) og hann leikstýrir einnig myndinni.

Myndin segir frá áhöfn í geimskipinu Serenity í náinni framtíð og áhöfnin þarf að vernda River Tam(Summer Glau) unga skrítna stúlku sem býr yfir miklu leyndarmáli sem gæti tortímt orðspori ríkisstjórnarinnar. Útsendarar eru á eftir henni og áhöfnin þarf líka að komast af leyndarmáli Rivers,berjast við ráfætur/reavers og lifa af.

Mér fannst Serenity mjög leiðinleg,ekkert,nákvæmlega EKKERT gerist fyrsta klukkutímann og ég held að maður þurfi að vera rosalegt sci-fi nörd og hafa séð og fílað þættina til að geta fílað þessa. Handrit Whedons er ekki gott en ekki rusl,leikstjórn hans var sæmileg og leikurinn var ekki góður en Chiwetel Ejiofor var sæmilegur. Myndin er smá klisjukennd(ekki sérlega mikið) og samtölin eru oft asnaleg og rosalega klisjukennd. Myndin er tæknilega mjög vel gerð og tæknibrellurnar mjög góðar, myndatakan var líka mjög ágæt en mér líkaði ekki tónlistin. Serenity er með ofmetnustu myndum 2005 og er bara fyrir hörðustu Sci-fi aðdáendur.

Frábær mynd. Hefði ekki búist við svona miklu því mér fannst alveg ómögulegt að þeir gætu náð sögunni jafn vel fram og í þáttunum (firefly) en það gekk vel fyrir sig og myndin kom allveg frábærlega út.

Maður fékk að vita rosalega margt sem kom ekkert fram í þáttunum og það púslaði sögunni svo vel saman.

Mæli eindregið með þessari mynd, hún er flott á allan hátt.

Væntingar mínar til Serenity voru vægast sagt hlutlausar, sérstaklega þar sem að ég hef aldrei borið augum á Firefly-þættina eftir Joss Whedon (ekki að ég hafi ekki freistast til þess. Hef heyrt frábæra hluti um þá). Aftur á móti þá hef ég ávallt gaman af góðum vísindaskáldskap og bara ævintýramyndum almennt, og sem slík get ég fullyrt að hér sé alveg stórskemmtilegur glaðningur á ferð. Serenity er hröð, vel skrifuð, spennandi, fyndin og krydduð óvæntum útúrsnúningum sem ná að útrýma mörgum
fjölkunnugum klisjum - sem er alltaf gott.Leikarar standa sig einnig vel. Nathan Fillion hefur verið eitt af þessum andlitum sem maður kannast við á meðan maður þekkir ekki leikarann beint. Hann hefur skotið upp kollinum í smáum hlutverkum og gamanþáttaseríum, en aldrei skilið eftir einhver eftirminnileg spor. Engu að síður er þessi maður alveg stórskemmtilegur hérna og túlkar andhetjuna Mal Reynolds með stórfínum tilþrifum. Karakter hans er eitthvað svo svalur en jafnframt skondinn með sína fleygðu frasa. Minnir líka einstaka sinnum á Han Solo. Aðrir leikarar standa sig einnig vel, þótt lítið þýði að telja alla upp. Eina undantekningin er kannski Summer Glau, sem fer með hlutverk trufluðu hörkupíunnar River Tam. Hún kannski segir ekki mikið en hún hefur ákveðna útgeislun í nærveru sinni sem skilur margt eftir sig.Tæknibrellur myndarinnar eru annars ótrúlega flottar, og eru meira en bara skraut á skjánum. Serenity býr yfir athyglisverðum söguþræði sem heldur góðu jafnvægi í samræmi við hasarinn. Á endanum er erfitt að fullyrða annað en að myndin sé massagóð afþreying. Persónusköpunin er líka furðu vel meðhöndluð, miðað við hvað það eru margir á skjánum. Mér var orðið ósköp annt um flesta þegar leið að lokaspretti myndarinnar, sem er helvíti öflugt þegar það kemur frá einhverjum sem hefur aldrei fjárfest tímann sinn í þættina. Get vel trúað því að myndin hafi ögn sterkari áhrif á aðdáendur.Sem vísindaskáldskapur er þetta mögulega einhver besta mynd sinnar tegundar í langa tíð. Eins mikið og ég var hrifinn af Revenge of the Sith þá á hún alltaf meira erindi til fantasíugeirans þannig að Serenity er ofarlega á lista yfir bestu sci-fi myndir áratugarins sem er núna hálfnaður. Það er spurning hvort það segi meira um þann geira heldur en þessa mynd. En ef það bætir úr einhverju þá gef ég myndinni meira en solid meðmæli. Síðan er bara næst á dagskrá að kynna sér þættina...8/10

Frábær skemmtun! Ég gerði ekki miklar væntingar til Serenity, bjóst við spennandi, frumlegri og skemmtilegri framtíðarmynd... Og ég fékk meira en það. Ég hef ekki séð þættina, en mun pottþétt leita eftir því. Leikstjórinn og handritshöfundurinn Joss Whedon, á að baki vinsæla þætti eins og Buffy the Vampire Slayer og Angel. Hann hefur greinilega verið á réttri leið með Firefly þættina og er að gera mjög flotta hluti hér. Í stuttu máli er hér um að ræða nokkuð fjarlæga framtíð (eftir 500+ ár) þar sem mannfólkið hefur fyllt jörðina og hefur hafið búsetu á fjarlægum hnöttum. Aga er haldið með ýmsum aðferðum en stúlkan River er einstök og uppreisnargjarnari en gengur og gerist og getur það jafnt verið henni í hag sem og óhag. Bróðir hennar bjargar henni frá misnotkun yfirvalda og felur hana um borð í geimskutlunni Serenity. Þar eru fyrir áhugaverðar persónur og öll eiga þau meiri samleið eftir því sem á myndina líður. Flótti þeirra undan hinum skelfilegu ráfætum og fulltrúm yfirvalda, með hinn ískalda ‘The Operative’ í fararbroddi, virðist engum takmörkum háð og þó er alltaf stutt í skruggugóðan húmor inn á milli. Hér eru frábærar tæknibrellur á ferðinni og myndin hefur áreiðanlega kostað sitt, líkt og þættirnir. Leikarana hefur maður flesta séð áður hér og þar. Nathan Fillion (Two guys, girl and a pizza place, Buffy..., Miss Match o.fl.) smellpassar inn í hlutverk kafteinsins Mal; Adam Baldwin (sást m.a. í X-files, The Visitor, Angel o.fl.) leikur Jayne, þennan klassíska bardagaglaða og kaldhæðna félaga; Gina Torres (Matrix, Alias, Angel, 24 o.fl.) er glæsileg í hlutverki hinnar þrautseigu Zoe; Alan Tudyk (I, Robot, Dodgeball o.fl.) leikur mann hennar, hinn ráðagóða flugmann Wash; og systkinin River og Simon Tam eru mjög vel túlkuð af ballerínunni Summer Glau (Angel, 4400 o.fl) og hinum myndarlega Sean Maher (Party of five, Brian’s Song o.fl.); hin skemmtilega Kaylee er leikin af Jewel Straite (Da Vinci’s Inquest o.fl.); og hin fríða Inara er í höndum Morena Baccarin. ‘The Operative’ er snilldarlega leikinn af Chiwete Ejiof (sást í Love Actually, Four Brothers o.fl.). Allir leikarar eru vel valdir og hafa að auki úr mjög áhugaverðum og sterkum karakterum að moða. Aukapersónur eru ekki síður eftirminnilegar, til dæmis tvíburarnir Mingo og Fanty, Mr. Universe og Shepherd Book úr þorpinu. Fátt er um klisjur og endurtekningar í þessari mynd. Söguþráðurinn er hörkuspennandi og heldur manni pikkföstum frá upphafi til enda. Tónlistin er meira að segja mjög frumleg, gítarómar o.fl. spes sem gerir hana enn sérstæðari. Sem sagt í alla staði er Serenity frábær og nokkuð óvæntur smellur að mínu mati sem ég vona að sem flestir kíki á í bíó. Ég mæli allavega með myndinni fyrir þá sem fíla þætti og myndir með ævintýralegu spennu- og bardagaívafi eins og Buffy og Angel… og ef til vill Star Trek. Ég tek ekki annað í mál en að framhaldsmynd verði gerð áður en langt um líður og bíð óþreyjufull og tilbúin með fullt hús stiga handa henni:-) Takk fyrir mig!

Það er ávallt gaman að fara í bíó á mynd sem þú veist ekkert um og kemur í ljós að myndin er helvíti góð, þannig var Serenity reynslan mín. Myndin er víst beint framhald af Firefly þáttunum eftir Joss Whedon, ég hafði ekki hugmynd um hvað Firefly er og ég hef ekki ennþá séð þá. Serenity fjallar um River, stelpu sem hefur ofurnáttúruleg öfl eins og ofurstyrk/hraða og getur séð fram í tíman, hún er fangi hjá ríkisstofnun sem vill nýta krafta hennar en bróðir hennar Simon bjargar henni og felur hana í skipi Mals (Nathan Fullion). Myndin gerist 500 ár í framtíðina þegar Jörðin hefur uppfyllst af fólki og margir hafa flust til annarra reikisstjarna og eftir það hafa ríkisskipulög manna skipst í marga flokka og auðvitað fylgir ósætti með því, eins og borgarstyrjaldir og fleira, Nathan Fullion sem leikur Mal var fyrrverandi hermaður í mótspyrnuhernaði í stríði mörgum árum fyrr. Sem Mal hefur hann smá Indiana Jones stæla, getur vel talist sem Indiana Jones geimsins, þar sem ég sá Fullion seinast vælandi í Saving Private Ryan (vitlausi James Ryan) þá var ég mjög sáttur með gaurinn, bar hlutverkið óvenju vel. Svo koma þeir Alan Tudyk og Adam Baldwin sem flestir muna kannski eftir í Full Metal Jacket. Ég hélt fyrst að myndin myndi vera mjög dauf á ofbeldi þar sem hún er framhald á sjónvarpsþáttum, en gott að myndin er mjög ofbeldisfull, eða frekar að hún reynir ekki að fela ofbeldið of augljóslega. Serenity er líklega með þeim betri vísindaskáldsmyndum seinustu árin (ég tel ekki Revenge of the Sith sem vísindaskáldskap), það tók smá tíma að komast inn í myndina þar sem ég vissi ekkert um hana né hafði séð þættina, en það tók alls ekki langan tíma og eftir það var ég gripinn af myndinni. Mjög vel gert hjá Joss Whedon segi ég, ég er mjög sáttur.

Sjaldan hafa sést jafn vandaðir sjónvarpsþættir í SciFi geiranum og Firefly þættirnir. Því miður voru þeir of dýrir og Fox hætti með þá eftir einungis ár. Framleiðandi þeirra snéri sér þá til kvikmyndafyrirtækjana og bjó til kvikmynd um þá að nafninu Serenity.



Serenity fjallar um hóp fólks sem ferðast um á geimskipinu Serenity og framkvæmir ýmis verkefni sem flest eru mis lögleg. Í skipinu er ung kona sem er partur af vísindatilraunum ríkisins á flótta og við komumst að því gegnum myndina hvað var gert við hana og af hverju svona mikið kapp er lagt á að drepa hana.



Fyrsti partur myndarinnar er má óreglulegur og minnir aðeins um of á sjónvarpsefni. En eftir smá stund nær myndin fullum skrúða og setur sig á stall sem ein besta vísindaskáldsaga sem sett hefur verið uppp á kvikmyndað form. Sagan og allt í kring er nógu jarðbundin til að vera hæf til að skemmta bæði aðdáendum og hið venjulega fólk. Án efa ein besta mynd sem komið hefur út það sem af er þessa árs.