Leik- og tónlistarkonan Miley Cyrus hefur verið ráðin í hlutverk í nýrri sex þátta sjónvarpsþáttaröð Woody Allen, sem enn hefur ekki fengið nafn.
Deadline segir frá því að auk Cyrus muni Allen sjálfur leika í myndinni ásamt Small Time Crooks leikkonunni Elaine May.
Um er að ræða fyrstu sjónvarpsþáttaröð Allen, og fyrsta verkefni Cyrus í sjónvarpi síðan hún lék í Disney þáttunum Hannah Montana. Það er Amazon verslunarrisinn sem framleiðir þættina.
Allen nagaði sig lengi í handarbökin fyrir að semja við Amazon um gerð þáttanna og sagðist á síðasta ári hafa séð eftir hverri sekúndu sem hefði liðið síðan þá. Samkvæmt Deadline er núna komið annað og betra hljóð í strokkinn.
Þættirnir munu gerast á sjöunda áratug síðustu aldar en meira er ekki vitað um efni þeirra.
Tökur hefjast í mars nk.
Miley Cyrus sagði frá ráðningunni á Instagram síðu sinni:
