Matrix 4 og 5 EKKI á leiðinni

Fyrir nokkrum dögum sögðum við frá því að Keanu Reeves hafi verið staddur í London og látið úr sér að tvær nýjar Matrix myndir væru á leiðinni. Þetta hafði vefsíðan Ain’t It Cool News ‘staðfest’ nýlega, en nú er komið í ljós að svo er ekki. Vefsíðan IndieWire tók sig til og hafði samband við fulltrúa leikarans sem þvertóku fyrir að fleiri Matrix myndir væru á leiðinni.

Ekki nóg með það heldur sögðu fulltrúar leikarans að Reeves hafi ekki einu sinni verið staddur í London School of Performing Arts eins og kom fram í upprunalegu fréttinni. Þetta hefur þá verið lítið annað en gabb, eins og gengur og gerist í kvikmyndafréttaheiminum, en það eru væntanlega margir sem anda léttar nú þegar Matrix serían verður látin kyrr. Í bili.

– Bjarki Dagur