Columbia Pictures ( sem er í eigu Sony Pictures Entertainment) langar að gera framhald af myndinni Bad Teacher með Cameron Diaz í aðalhlutverki. Leikstjóri verður Jake Kasdan og handritshöfundur Justin Malen.
Samkvæmt Deadline vefsíðunni þá vilja framleiðendur fá Diaz aftur til að leika aðalhlutverkið, en ekki er enn búið að semja við leikkonuna.
Diaz fékk greitt fyrirfram fyrir fyrri myndina, og fékk síðan hlutdeild í hagnaði myndarinnar. Þar sem myndin sló óvænt í gegn, fékk Diaz stóra summu í eigin vasa.
Yfirmaður framleiðslumála hjá Sony Pictures, Hanna Minghella, sagði að kvikmyndaverið „elskar nálgun Justin á efnið – það slær á allar réttu nóturnar sem gerðu fyrri myndina að óvæntum smelli og tekur einnig persónurnar í nýjar áttir sem eru bæði ferskar og fyndnar.“
Bad Teacher 1 þénaði 216 milljónir Bandaríkjadala á alheimsvísu, auk þess sem búið er að semja um gerð 16 hálftíma langra sjónvarpsþátta sem eru byggðir á myndinni, og sýndir verða á CBS sjónvarpsstöðinni.
Með aðalhlutverk í sjónvarpsþáttunum fer Ari Graynor, sem má sjá á mynd hér til vinstri.
Næsta verkefni Jake Kasdan er myndin Sex Tape með Diaz og Jason Segel í aðalhlutverkum.