Jackie Chan hefur staðfest að Chinese Zodiac verði síðasta hasarmyndin hans. Í staðinn ætlar hann að einbeita sér að dramatískum hlutverkum.
Hinn 58 ára Chan hóf feril sinn sem áhættuleikari í hasarmyndum og er þekktur fyrir að leika sjálfur í öllum áhættuatriðum sínum.
„Ég er ekki ungur lengur. Ég er orðinn mjög, mjög þreyttur,“ sagði hann við The Telegraph fyrr á árinu og bætti við að nóg af ofbeldi sé til í heiminum án þess að hann bæti enn einni hasarmyndinni í sarpinn.
Chan sagðist í viðtalinu vilja líkjast stórleikaranum Robert De Niro. „Ég vil að áhorfendur sjái að ég er ekki bara fyndinn. Ég get leikið. Smám saman mun ég sýna ykkur hinn sanna Jackie Chan.“
Chan var nýverið kjörinn mannvinur ársins af tímaritinu Harper´s Bazaar. Chinese Zodiac kemur út í lok desember vestanhafs.