Leikstjóri hinnar geysivinsælu The Hangover, Todd Phillips, vinnur nú hörðum höndum við að kynna framhaldið, The Hangover Part II, sem er aðeins örfáum dögum frá því að lenda í kvikmyndahúsum. Á blaðamannafundi lét Phillips hafa það eftir sér að þriðja myndin í seríunni væri möguleiki.
„Við hugsuðum þetta alltaf sem þríleik.“ sagði Phillips. „Þriðja myndin yrði endirinn á sögunni. Það eina sem ég get sagt er að ég hef ekki rætt þetta við leikarana, en þriðja myndin yrði ekki byggð á sömu formúlu. Hún yrði öðruvísi.“
Margir bíða spenntir eftir The Hangover, Part II en talsverð pressa er á myndinni til að standa undir nafni. Að lokum var Phillips spurður hvar þriðji hluti Hangover seríunnar myndi gerast. „Ég mæli með að öll lönd bjóði mér í heimsókn, umkringi mig áfengi og fallegum konum, svo ákveð ég mig.“
