Leikkonan Heather Graham hefur ekki verið mjög áberandi síðustu ár, en hún er þó enn eftirsótt, enda skemmtileg leikkona. Margir muna eftir henni úr Austin Powers: The Spy Who Shagged Me, en síðast mátti sjá hana í The Hangover 3, sem nú er í bíó. Næsta mynd með Graham í aðalhlutverki heitir Compulsion.
Compulsion er leikstýrt af Egidio Coccimiglio, en í henni leikur Graham matreiðslumeistara sem verður heltekinn af nágranna sínum, sem er leikin af Matrix leikkonunni Carrie-Anne Moss. Sú er gömul barnastjarna sem persóna Graham dýrkaði í æsku.
Myndinni er lýst sem drama spennutrylli, en miðað við stikluna sem má sjá hér að neðan virðist vera gamansamur tónn í henni.
Myndin verður frumsýnd í Bandaríkjunum á föstudaginn næsta, þann 21. júní.
